ವೀರಾಜಪೇಟೆ. ಡಿ.20: (ಕಿಶೋರ್ ಕುಮಾರ್ ಶೆಟ್ಟಿ) ವಿರಾಜಪೇಟೆ ಪಕ್ಕತ ಅರಾಯಿರ ನಾಡ್ರ ಕಾಲತ ಮಂದ್ ನಮ್ಮೆ ಕಾಲೋದಿರನ್ನಕೆ ಆಟ್ ಪಾಟ್ ಎಡಮೇಂಗಿತ್ ಕೈಂಜತ್.
ಬೈರನಾಡ್, ಎಡೆನಾಡ್, ಬೋಟೋಳಿನಾಡ್ ಪಿಂಞ ಪೆರುವನಾಡ್ಕ್ 17 ಆಡ್ಂಗ್ನ ಊರ್ ಕೇರಿರವಿರಾಜಪೇಟೆ ಕೊಡವ ಸಮಾಜ ಪಕ್ಕತ ಪೂಮಾಲೆ ಮಂದ್ಲ್ ನಡ್ಂದತ್. ಊರ್ ನಾಡ್ಂಜಿ, ಪೊರಪಾಡಾಯಿತ್ ಬಂದಿಂಜ ಎಲ್ಲಾರ್ನೂ ಕೊಟ್ಟ್ ಪಾಟಾಯತ್ ತಕ್ಕಾರ ಮಾಡಿತ್, ತಕ್ಕಂಗ ಮಂದ್ಗರೆಲುಳ್ಳ ಚಿತ್ತಾಲ್ ಮರಕ್ ಪೂಮಾಲೆ ಇಟ್ಟಿತ್ ಮೊಳಿ ಇಟ್ಟತ್.
ಮಾಮೂಲ್ರನ್ನಕೆ ಆಟ್ ಪಾಟ್, ಪರೆಕಳಿ ನಡ್ಂದತ್. ಕಬ್ಬಚ್ಚೀರ ಕಾರ್ಯಪ್ಪ ಅಯಿಂಗಡ ನೆಪ್ಪುಲ್ ಮಕ್ಕಳಾನ ಬೋಪಣ್ಣ ಮತ್ತು ನಂಜಪ್ಪ ಅವು ಬೆಚ್ಚ ನಲ್ಲ ಆಟ್ಕಾಎ ರೋಲಿಂಗ್ ಟ್ರೋಫಿನ ಮಗ್ಗುಲಕಾರಳಾನ ಚೋವಂಡ ನಿಖಿಲ್ ಅವು ಪಡ್ಂದಂಡತ್, ಪರೆಕಳಿ ಪೈಪೋಟಿಲ್ ಬೋಟೋಳಿಕಾರಾಳನ ಬೊಪ್ಪಚಂಡ ಮಾಚಯ್ಯ ಪಿಂಞ ಕಬ್ಬಚ್ಚೀರ ಮಾಚಯ್ಯ ಆದ್ಯ ಇನಾಂ ಪಡ್ಂದಂಡತ್. ಕೊಡವ ಸಮಾಜ ನಡ್ತಿಯಂಡುಳ್ಳ, ತ್ರೀವೆಣಿ ಆಂಗ್ಲ ಮಾದ್ಯಮ ಸ್ಕೂಲ್ರ ಆಮಕ್ಕಳುಂಡ್ ಚೌರಿ ಆಟ್ ಮೂಡಿಮಕ್ಕಡ ಉಮ್ಮತಾಟ್ ಜನ ಮೆಚ್ಚಿಗೆ ಪಡ್ಂದಂಡತ್. ತರಾವರಿ ಆಟ್, ಪಾಟ್ ಪೈಪೋಟಿಲ್ ಕೂಡಿಯಾಡಿತ್ ಗೆದ್ದೈಂಗಕ್ ಆರಾಯಿರ ನಾಡ್ ಸಮಿತಿನುಂಡ್ ಇನಾಂ ಬಳ್ಂಬುಚಿ.
ಪೂಮಾಲೆ ಮಂದ್ ಸಮಿತಿರ ಕೊರವುಕಾರ, ಅಜ್ಜಿನಿಕಂಡ ಸುಧೀರ್ ಕೂಡ್ಕೊರವುಕಾರ ವಾಟೇರಿರ ಶಂಕರಿ ಪೂವಯ್ಯ, ಮರಣ ಫಂಡ್ ಕೊರವುಕಾರ ಚೇಂದಂಡ ಪೊನ್ನಪ್ಪ, ಕಳಿಕೂಟ್ ಸಮಿತಿರ ಕೊರವುಕಾರ ಪುಗ್ಗೇರ ನಂಧಾ ಪಿಂಞ ಎಲ್ಲಾ ಕೂಟಾಳಿಯ ಕೂಡ್ನನಕೆ, ಬೈರನಾಡ್ಕ್ ಅಡ್ಂಗುವ ಹಾಲುಗುಂದ, ಒಂಟಿಅಂಗಡಿ, ದೇವಣಗೇರಿ, ತಲಗಟ್ಟಕೇರಿ, ಹಚ್ಚಿನಾಡ್ ಎಡೆನಾಡ್ರ ಕುಕ್ಲೂರು, ಚೆಂಬೆಬೆಳ್ಳೂರು, ಐಮಂಗಲ, ಮಗ್ಗುಲ, ವೈಪಡ, ಬೋಟೊಳಿನಾಡ್ರ ಆರ್ಜಿ, ಬೋಟೋಳಿ, ಪೆರುವನಾಡ್ರ ಬುಟ್ಟಂಗಾಲ, ನಾಂಗಾಲ, ಪಿಂಞ ಬಾಳೂಗೋಡ್ ಊರ್ ಕೇರಿರ ಮಾಜನ ಪಿಂಞ ಅಭಿಮಾನಿಯ ಏರ ಕಣಕಲ್ ಕೂಡಿಯಾಡಿತಿಂಜತ್.