ಸೂರ್ಲಬ್ಬಿ, ಫೆ, 10: ಸೂರ್ಲಬ್ಬಿ ನಾಡ್ರ ತಲೆಂದೇವ, ಅನ್ನದಾತ ಸುಬ್ಬಪ್ಪಂದ್ ಕೇಳಿ ಪೋಯಿತುಳ್ಳ, ಆದಿ ಕುಕ್ಕೇಂಜ ದಂಡನೇ ಸ್ಥಾನನೆಲೆಕೊಂಡ ಸೂರ್ಲಬ್ಬಿ ನಾಡ್ರ ಸುಬ್ರಯ್ಯಂಡ ಕಾಲತ ನಮ್ಮೆ ಕುಂಬ್ಯಾರ್ 01 ಪಿಂಞ 02 (ಫೆಬ್ರವರಿ 13 ಪಿಂಞ 14)ನೇ ಬ್ಯಾಳಾಚೆ ಪಿಂಞ ಬೊಳ್ಯಾಚೆ ಪಿಂಞ ಸುಬ್ರಯ್ಯಂಡ ತಮ್ಮನಾಯಿತ್ ನೆಲೆನಿಂದಿತುಳ್ಳ, ಬಯಂದದನ್ನ ತಪ್ಪ, ಹೂವತಪ್ಪ, ವನಮೂರ್ತೀಂದ್ ಕೇಳಿಪೋಯಿತುಳ್ಳ ಮಂಜುನಾಥ ಮಹಾಸ್ವಾಮಿರ ಕಾಲತ ಮಡೆ ಕುಂಬ್ಯಾರ್ 03(ಫೆಬ್ರವರಿ 15)ನೇ ಚೆನಿಯಾಚೆ ನಡ್ಪ.
ಇಕ್ಕಾಕಲೇ ನಮ್ಮೆಕೊತ್ತನ್ನಕೆ ಆಯಿಮೆ ಕೊಯಿಮೆ ನಡ್ಂದಂಡ್ ಉಂಡ್. ಆ ಪೋಲೆ ಫೆಬ್ರವರಿ 13ನೇ ಬ್ಯಾಳಾಚೆ, ಮಜ್ಜಣ 01 ಗಂಟೆಕ್ ಎತ್ತ್ ಪೋರಾಟ್, ಬೊಳಕಾಟ್, ಮಂಗಳಾರತಿ, ಪಟ್ಟಂಬರ್ಕೆ, ಕೂಳ್ದಾನ ನಡ್ಂದಕ, 14ನೇ ಬೊಳ್ಯಾಚೆ ಇರ್ಲ್, 02 ಘಂಟೆಂಜ ಬೊಳಕಾಟ್, ಮಹಾಮಂಗಾಳರತಿ, ತೆಂಗೆಪೋರ್, ಮಡೆಸ್ಥಾನ, ದ್ಯಾವಡ ಅನುವಾದ, ಬಯ್ಯನೀರ್, ಮಕ್ಕಫಲ, ಪಟ್ಟಂಬರ್ಕೆ, ಮಂಡೆಮುಡಿ, ಪಟ್ಟಂಬರ್ಕೆ ಬೇಂಗೋ, ಪ್ರಸಾದ ಬಳ್ಂಬುವ ಆಯಿಮೆ ನಡ್ಪ. ಒಯ್ಪತ್ ಬಂಡಾರ ಅಡ್ಕಿತ್, ನೆರ್ಪುಮಾನಿಲ್ ಬೊಳಕಾಟಾಯಿತ್, ನಾಡೆಕಾಕಿತ್, ತಪ್ಪಡಕ ಕೆಟ್ಟಿತ್ ತೆಂಗೆಬೊಡಿ ಬೆಚ್ಚಪಿಂಞ ಸುಬ್ರಯಂಡ ಕೆಟ್ಟ್ ಪೊಳಿಯುವ.
ಫೆಬ್ರವರಿ 15ನೇ ಚೆನಿಯಾಚೆ ವನಮೂರ್ತಿರ ಸ್ಥಾನನೆಲೆಯಾನ ಹೂವತಪ್ಪಂಡ ಕೊಲ್ಲಿಲ್ ಮಂಜುನಾಥಂಡ ಮಡೆ ನಡ್ಪ. ಅಂದ್ ಪೊಲಂಜತಿಕೆ ಸುಬ್ರಯ್ಯಂಡ ತಿರಿಕೆಂಜ ಪಾಯಸ ಚೆಟ್ಟಿಯೋಡೆ ಪೋಯಿತ್, ವನಮೂರ್ತಿರ ಬಂಡಾರ ಮನೇಂಜ, ಮಡೆಬಟ್ಟಿ, ಬಂಡಾರ ಪೊಟ್ಟಿ ಸಮೇತ ಹೂವತಪ್ಪಂಡ ಕೊಲ್ಲಿಕ್ ಪೋಯಿತ್, ನೇಮಕೊತ್ತನ್ನಕೆ ಮಡೆ ತೋಡಿತ್, ದ್ಯಾವಡ ಅನುವಾದ, ಬಯ್ಯನೀರ್, ಮಕ್ಕಫಲ, ಪಟ್ಟಂಬರ್ಕೆ, ಮಂಡೆಮುಡಿ, ಪಟ್ಟಂಬರ್ಕೆ ಬೇಂಗಿತ್, ಪ್ರಸಾದ ಬಳ್ಂಬಿತ್, ಬೊಳಕಾಟ್ ಆನದು ನಾಡೆಕಾಕಿತ್, ತಪ್ಪಡಕ ಕೆಟ್ಟಿತ್, ತೆಂಗೆಬೊಡಿ ಬೆಚ್ಚಿತಾನದು ಈ ಕಾಲತ ನಮ್ಮೆಕಟ್ಟ್ ಪೊಳಿಯುವ.
ಈ ನಮ್ಮೆಲ್, ಸುಬ್ರಯ್ಯಂಡ ಪೊಂಗೊಡೆರೊಳ್ಲ್ ಅಡ್ಂಗಿ ನಿಂದ, ಸೂರ್ಲಬ್ಬಿನಾಡ್ರ ಅಂಜಿಕೇರಿ ನೂರೊಕ್ಕಳಾನ ಸೂರ್ಲಬ್ಬಿ, ಮುಟ್ಟ, ಕುಂಬಡಿ, ಮಕ್ಕೇತ್ ಪಿಂಞ ಕ್ಕ್ಕಳಿ ಊರ್ಕಾರ ಒಲೆಯಣ ಕೂಡಿ ನಡ್ತುವ ಈ ನಮ್ಮೆಕ್ ಊರ್, ನಾಡ್, ದೇಶತ, ಎಲ್ಲಾ ಬೆಂದು ಚಂಙಾದಿ, ಸಾಲ್ ಸಂತಾನ, ಸಿನೇತೆಂಗ ಸಾಲಡಂಗ ಬಂದ್ ಕೂಡೋಂಡೂಂದ್ ನಾಡ್ರ ತಕ್ಕ ಮುಕ್ಕಾಟಿಯ, ಆಡಳಿತ ಮಂಡಳಿ, ನಾಡ್ಕಾರ ಕೇಟಂಡಿತ್.