ಕಕ್ಕಬ್ಬೆ, ಫೆ.28:- ಕೊಡವಡ ಕುಲದೇವ, ಮಳೆದೇವ, ಅನ್ನದಾತಂದ್ ಕೇಳಿ ಪೋಯಿತುಳ್ಳ, ಪಾಡಿ ಶ್ರೀ ಇಗ್ಗುತಪ್ಪ ದೇವಂಡ ಕುಂಬ್ಯಾರ್ ಕಲಾಡ್ಚ ನಮ್ಮೆ, ಇದೇ ಫೆಬ್ರವರಿ 13 (ಕುಂಬ್ಯಾರ್ 29)ನೇ ಬ್ಯಾಳಾಚೆ ನಡ್ಪಾಂದ ದ್ಯಾವ ತಕ್ಕಂಗಳಾನ ಪರದಂಡ ಒಕ್ಕಕಾರ ಅರಿಚಿಟ್ಟಿತ್.
ಆ ಮಾರೀಪತ್ ಇಂದ್ ಮಜ್ಜಣ (28/02/25) ಇಗ್ಗುತಪ್ಪಂಡ ಆದಿನೆಲೆ ಮಲ್ಮತ್ ನಮ್ಮೆ ಕಟ್ಟ್ ಬುದ್ದಿತ್. ಪಾಡಿ ನಾಲ್ನಾಡ್ಕ್ ಮಾತ್ರ ಅಡ್ಂಗುವ ಈ ದೇಶಕಟ್ಟ್ ಮಾರ್ಚ್ 13ನೇ ಬ್ಯಾಳಾಚೆ ಮಜ್ಜಣ, ಮಲ್ಮತ್ ಕಟ್ಟ್ ಪೊಳಿವ.
ಪಂಡೇತ ನಡೆ ನುಡಿಪೋಲೆ ಅಂದ್ ಪೊಲಾಕ 9.30ಘಟೆಕ್ ದೇವಕ್ಕಂಗಳಾನ ಪರದಂಡ ಪಿಂಞ ಪೇರಿಯಂಡ ಒಕ್ಕತಿಂಜ ಜೋಡ್ ಚೋಮ ಪೋರ್ ಬಪ್ಪ. ಇದಂಡ ಕೂಟ್ಕ್ ಮಾದಂಡ, ಕೋಡಿಮಂಣಿಯಂಡ, ಚೌರಿರ, ಅಲ್ಲಾರಂಡ ಒಕ್ಕಕಾರಡ ಚೋಡೆತ್ತ್ ಪೋರಾಟ ಬಪ್ಪ. ಇದಾನದು ಎಂದೆತ ಪೋಲೆ, ತುಲಾಭಾರ, ಮಾಪೂಜೆ ಕೈಂಜಿತ್ ಮಜ್ಜಣ ದೇವಡ ಪರಸಾದ ಬಳ್ಂಬಿತ್ ಆನಪಿಂಞ ದ್ಯಾವಡ ರೂಪುರ ಕೂಡೆ, ಮಲ್ಮಕ್ ಪೋಪ.
ಅಲ್ಲಿಕ್ ಪಾಡಂಜ ಪೋಪ ಜೋಡೆತ್ತ್ ಪೋರಾಟವೇ ಅಲ್ಲತೆ, ನೆಲ್ಜಿ, ಪೇರೂರ್ ಇಗ್ಗುತಪ್ಪಂಡಲ್ಲಿಂಜ ಬಪ್ಪ ಜೋಡೆತ್ತ್ ಪೋರಾಟ್ರ ಕೂಡೆ ಕೂಡಿತ್, ಮಲ್ಮತ್ ಕಟ್ಟ್ ಪೊಳ್ಚಿತ್, ಅಂದಿಮುಂದಿ ನ್ಯಾರಕ್ ಪಾಡಿ ಇಗ್ಗುತಪ್ಪಂಡ ನೆಲೆಲ್, ಇಗ್ಗುತಪ್ಪಂಡ ಆರಾಟ್ ಬೊಳಾಕಾಟ್ರ ಕೂಡೆ ಕುಂಬ್ಯಾರ್ ಕಲಾಡ್ವ ನಮ್ಮೆ ತೀವಾಂದ್ ದೇವತಕ್ಕಂಗಳಾನ ಪರದಂಡ ಒಕ್ಕಕಾರ ಅರಿಚಿಟ್ಟಿತ್.