ಬೆಂಗಳೂರ್, ಮೆ. 29: (nadubadenews): ಬೆಂಗಳೂರ್ ಕೊಡವ ಸಮಾಜಕ್ ಚುನಾವಣೆ ಪಕ್ಕ ಬಂದಲ್ಲಿ, ಚೆನ್ನಂಗ್ ಸದಸ್ಯಂಗ ಈ ಕುರಿ ಚುನಾವಣೆ ಮಾಡೋಕಾಗ ಬದಲ್‌ಕ್ ಇಕ್ಕ ಉಳ್ಳ ಆಡಳಿತ ಮಂಡಳಿನೇ ಮಿಂಞಕ್ ಕಾರ್ಬಾರ್ ಮಾಡೋಕ್ ಬುಡೋಂಡು, ಈ ವಿಚಾರತ್ ತಕ್ಕ್ ಬಾಕ್ ಮಾಡೋಕ್ ತೊಡಿಕೆ ವಿಶೇಷ ಮಾಸಭೆ ಕಾಕೋಂಡೂಂದ್ ವರಾತ ಮಾಡಿತ್ ಕಾಗದ ಎಳ್ದಿತ್, ಸೈನ್ ಚಳುವಳಿ ಮಾಡ್ಯಂಡುಂಡ್.
ಕೈಂಜ 100+ ಕಾಲತೊಟ್ಟ್ ಬೆಂಗಳೂರ್ ಕೊಡವ ಸಮಾಜ ತಾಂಡದೇ ಪೆರ್ಮೆಲ್ ಕಾರ್ಯಭಾರ ಮಾಡ್ಯಂಡ್ ಬಂದಿತ್. ಎಲ್ಲಾ ಆಡಳಿತ ಮಂಡಳಿಯೂ ಸಮಾಜತ ಬೊಳ್ಚೆಕ್ ನೈಚಿತ್. ಆಚೇಂಗಿ ಇಕ್ಕತ ಆಡಳಿತ ಮಂಡಳಿ ಸರ್ಕಾರತಿಂಜ ದಕ್ಕಂಡಿಂಜ ಏಳೇಕ್ರೆನ ದಕ್ಕ್‌‌ಚಿಟ್ಟವಲ್ಲಿ ಆಖೀರಿ ಮೊಟ್ಟ್‌ಕ್ ಎತ್ತಿತುಳ್ಳಲ್ಲಿ ಚುನಾವಣೆರ ಕಾಲ ಬಂದಿತ್. ಇಕ್ಕ ಚುನಾವಣೆ ಆಯಿತ್ ಪುದಿಯ ಆಡಳಿತ ಮಂಡಳಿ ಪುಡ್ತಕ್ ಬಂತ್, ಪೂನಾದ್ಯ ಏಳೆಕ್ರೆರ ಬಯ್ಯ ಒದ್ದಾಡೋಂಗಿಂಜ, ಇಕ್ಕ ಉಳ್ಳೈಂಗಳನೇ ಈ ಕಾರ್ಬಾರ್ ಆಕಣೆಕ್ ಆಡಳಿತತ್ ಬುಡೋಂಡು, ಎಣ್ಣುವ ವರಾತತ್ ವಿಶೇಷ ಮಾಸಭೆ ಕಾಕೋಂಡೂಂದ್ ಬೆಂಗಳೂರ್ ಕೊಡವ ಸಮಾಜತ ಸದಸ್ಯಂಗ ಕಾಗ ಎಳ್ದಿತ್ ಸೈನ್ ಚಳುವಳಿ ಮಾಡ್ಯಂಡುಂಡ್. ಇಕ್ಕಾಕಲೇ ಸುಮಾರ್ 300+ ಸೈನ್ ಇಟ್ಟಿತ್ ಇಂಞಚ್ಚಕೂ ಸೈನ್ ಇಟ್ಟಂಡ್‌ ಉಂಡ್. ಕಡೇಕ್ ಸಮಾಜ ಆಡಳಿತಕ್ ಎತ್ತ್‌ಚಿಟ್ಟಿತ್ ತಂಗಡ ಬೋಡಿಕೆನ ಬೆಪ್ಪ ಏರ್ಪಾಡ್ ಆಯಂಡುಂಡ್ಂದ್ ಅರ್ಂಜಿತ್.