ಬೆಂಗಳೂರ್, ಜು.24;(nadubadenews) : ಬಪ್ಪ ಸೆಪ್ಟೆಂಬರ್ಲ್ ನಡ್ಪ ಬೆಂಗಳೂರ್ ಕೊಡವ ಸಮಾಜ ಆಡಳಿತ ಮಂಡಳಿ ಚುನಾವಣೆಲ್ ಕೂಡ್ಕಾರ್ಯಕಾರ (ಜಾಯಿಂಟ್ ಸೆಕ್ರೆಟರಿ) ಸ್ಥಾನಕ್ ಓರ್ ಪೈಪೋಟಿಕಾರನಾಯಿತ್, ಸರ್ಕಂಡ ಸೋಮಯ್ಯ ಅವು ಇಳ್ಂಜಿತ್.
ಕೈಂಜ ಸುಮಾರ್ ಕಾಲತೊಟ್ಟ್ ಸಮಾಜ ಸೇವೆ ಪಿಂಞ ವ್ಯಪಾರೋದ್ಯಮತೂ ಜನಮನಕ್ ಅರಿವುಳ್ಳ ಪಿಂಞ ಸಾಮಾಜಿಕ ಮಾದ್ಯಮತ್ ತಾಂಡ ವಾಯ್ಸ್ ರೆಕಾರ್ಡ್ರ ತಕ್ಕ್ಬಾಕ್ಲ್ ಜನಾಂಗತ ನೇರ್ ನಲ್ಲಾಮೆರ ವಿಚಾರತ್, ಅಭಿಪ್ರಾಯ ಎಣ್ಯಂಡ್ ಬೆಂಗಳೂರ್ ಮಾತ್ರ ಅಲ್ಲತೆ, ಕೊಡವು ಪಿಂಞ ಪೊರ ಊರ್, ದೇಶತೂ ಪೆದನೇಡಿತುಳ್ಳ ಇವು, ಬೆಂಗಳೂರ್ಲ್ ನೆಲೆನಿಂದಿತುಳ್ಳ ಶಿರಂಗಳ್ಳಿ ಊರ್ಕಾರಡ ಸಂಘತ್ರ ಕೊರವುಕಾರನಾಯಿತ್ ಕಾರ್ಬಾರ್ ಮಾಡಿತ್, ಕೈಂಜ 39 ಕಾಲತಿಂಜ ಕಾರ್ಬಾರ್ ಮಾಡ್ಯಂಡುಳ್ಳ ಬೆಂಗಳೂರ್ರ ಏಳ್ನಾಡ್ ಕೊಡವ ಸಂಘತ್ರ ಸಕ್ರಿಯ ಕಾರ್ಯಕರ್ತನಾಯಿತೂ, ಗರ್ವಾಲೆ ಕೊಡವ ಸಮಾಜತ್ರ ನಿರ್ದೇಶಕ ಪಿಂಞ ಸಲಹೆಕಾರನಾಯಿತೂ, ಕಾವೇರಿ ಕ್ರೆಡಿಟ್ ಸೌಹಾರ್ದ ಸಹಕಾರ ಸಂಘತ್ರ ಆಡಳಿತ ಮಂಡಳಿ ನಿರ್ದೇಷಕನಾಯಿತೂ ಕಾರ್ಬಾರ್ ಮಾಡ್ಯಂಡುಂಡ್.
ತಾನುಳ್ಳ ಎಲ್ಲಾ ಜಾಗತೂ, ಸಂಘ ಸಂಸ್ಥೆ, ಆಯಿಮೆ ಕೊಯಿಮೆಲೂ ತಾಂಡ ಕೈಲಾಪನೆಕೆ, ಜನಮನಕ್ ಒಪ್ಪನ್ನಕೆ ಸೇವೆ ಸಾಕಾರ ಮಾಡ್ಯಂಡ್ ತಾಂಡ ತಕ್ಕ್ ಬಾಕ್ಲೂ, ಗುಣಮನತೂ, ದಾನ ದರ್ಮತೂ ಜನಡ ಮನಸಸ್ಕ್ ಪಕ್ಕ ಆಯಂಡ್, ತಾಂಡ ಮನಸ್ಸ್ಕ್ ತೋಂದ್ನಾನ ತೊರಂದ್ ಪರ್ಂದಂಡ್ ಮುಚ್ಚಿಮರೆ ಇಲ್ಲತೆ ನೈಪ ನೈಪುಕಾರನಾನ ಸರ್ಕಂಡ ಸೋಮಯ್ಯ ಅವು, ಇದಿಕ್ಕ ಕೇಳಿ ಪೋನ ಬೆಂಗಳೂರ್ ಕೊಡವ ಸಮಾಜ ಆಡಳಿತ ಮಂಡಳಿಲ್ ಕೂಡ್ಕಾರ್ಯಕಾರ(ಜಾಯಿಂಟ್ ಸೆಕ್ರೆಟರಿ) ಆಯಿತ್ ನೈಪಕ್ ತಾಂಡದೇ ಸೊಪನ ಯೋಜನೆಲ್, ಏದೇ ಗುಂಪು ಕೂಟ ಇಲ್ಲತೆ ಒತ್ತೆಯಾಯಿತ್ ನಿಂದಂಡುಂಡ್.