ಹುದಿಕೇರಿ, ಮೇ. 19: (nadubade news) ಕೊಡವ ಒಕ್ಕಡೊಕ್ಕಡ ಕ್ರಿಕೇಟ್ ಕಳಿ ನಮ್ಮೆ ಚೆಕ್ಕೆರ ಕಪ್ಲ್ ಆಮಕ್ಕಡ ನಡುರ ಪೈಪೋಟಿಲ್ ನೆರವಂಡ ಒಕ್ಕ ಆದ್ಯ, ಅಚ್ಚಪಂಡ ಒಕ್ಕ ದಂಡನೇ ಇನಾಂ ಪಡ್ಂದಂಡಕ, ಪೊಮ್ಮಕ್ಕಡ ಪರ ಅರಮಣಮಾಡ ಆದ್ಯ ಓಡಿಯಂಡ ಒಕ್ಕ ದಂಡನೇ ಇನಾಂ ಪಡ್ಂದಂಡತ್.
ಹುದಿಕೇರಿರ ಜನತಾ ಹೈಸ್ಕೂಲ್ ಪರಂಬುಲ್ ನಡ್ಂದ 23ನೇ ಕಾಲತ ಈ ಕಳಿ ನಮ್ಮೆರ ಆಖೀರಿ ಪೈಪೋಟಿ ಇಂದ್ ನಡ್ಂದಲ್ಲಿ, ಆದ್ಯತ್ ಪೊಮ್ಮಕ್ಕಡ ಪೈಪೋಟಿ ಅರಮಣಮಡ ಪಿಂಞ ಓಡಿಯಂಡ ಒಕ್ಕಡ ನಡುಲ್ ನಡ್ಂದಲ್ಲಿ, ಆದ್ಯ ಬ್ಯಾಟ್ ಮಾಡ್ನ ಅರಮಣ ಒಕ್ಕಕಾರ ಎಟ್ಟ್ ಓವರ್ಕ್ ಮೂಂದ್ ವಿಕೇಟ್ ನಷ್ಟಕ್ 122ರನ್ ಮಾಡ್ನಕ, ಓಡಿಯಂಡ ಒಕ್ಕಕಾರ ದಂಡ್ ವಿಕೇಟ್ ನಷ್ಟಕ್ 46 ರನ್ ಮಾಡಿತ್ ದಂಡನೇ ಇನಾಂಕ್ ಕುಶಿಪಟ್ಟತ್. ಅರಮಣಮಾಡ ಪರವಾಯಿತ್, ಟೀನ 34 ಬಾಲ್ಕ್ 93 ರನ್ ಮಾಡ್ನಕ್ ಓಡಿಯಂಡ ಪ್ರೀತ 25 ಬಾಲ್ಲ್ 25 ರನ್ ಮಾಡ್ಚಿ. ಓಡಿಯಂಡ ಪ್ರೀತಾ ತಿಮ್ಮಯ್ಯ ನಲ್ಲ ಕಳಿಕರ್ತಿ ಬಿರ್ದ್ ಪಡ್ಂದತ್.
ಆಮಕ್ಕಡ ಕಳಿಲ್ ಆದ್ಯ ಬ್ಯಾಟ್ ಮಾಡ್ನ ಅಚ್ಚಪಂಡ ಒಕ್ಕಕಾರ ಎಟ್ಟ್ ಓವರ್ಲ್ ಏಳ್ ವಿಕೇಟ್ಕ್ 55 ರನ್ ಮಾಡ್ನಕ, ನೆರವಂಡ ಒಕ್ಕ 07 ಓವರ್ಲ್ 56ರನ್ ಮಾಡಿತ್, 08 ವಿಕೇಟ್ಲ್ ಆದ್ಯ ಇನಾಂನ ದಕ್ಕ್ಚಿಟ್ಟಂಡತ್. ಅಚ್ಚಪಂಡ ಮಿತುನ್ 19 ಬಾಲ್ಲ್ 25ರನ್ ಮಾಡ್ನಕ ನೆರವಂಡ ಪ್ರವೀಣ್ 13 ಬಾಲ್ಕ್ 20ರನ್ ಮಾಡ್ಚಿ. ನೆರವಂಡ ವರುಣ್ ಪಿಂಞ ಅಚ್ಚಪಂಡ ಮಿತುನ್ ಅವು ನಲ್ಲ ಕಳಿಕಾರ ಬಿರ್ದ್ ಪಡ್ಂದಂಡತ್.
ಆಖೀರಿ ಕಳಿರ ಆದ್ಯತ್ ಎಲ್.ಎ.ಸಿ. ಪಿಂಞ ವಿರಾಜಪೇಟೆ ಶಾಸಕ ಅಜ್ಜಕುಟ್ಟಿರ ಪೊನ್ನಣ್ಣ ಅವು ಆಖೀರಿ ಕಳಿಕ್ ಮೊಳಿ ಇಟ್ಟಕ, ಖನಪಟ್ಟ ಬೆಂದುವಳಾಯಿತ್ ತೀತಿರ ರೋಷನ್ ಅಪ್ಪಚ್ಚು, ಕಿರಿಕೆಟ್ ಅಕಾಡೆಮಿ ಕೊರವುಕಾರ ಕೀತಿಯಂಡ ಕಾರ್ಸನ್ ಕಾರ್ಯಪ್ಪ, ಚೆಕ್ಕೆರ ಕಪ್ ಕ್ರಿಕೆಟ್ ನಮ್ಮೆರ ಕೊರವುಕಾರ ಚೆಕ್ಕೆರ ಚಂದ್ರಪ್ರಕಾಶ್, ಅಂಜಿಗೇರಿ ನಾಡ್ತಕ್ಕ ಚೆಕ್ಕೆರ ರಾಜೇಶ್, ಹುದಿಕೇರಿ ಗ್ರಾಮ ಪಂಚಾಯತಿ ಅದ್ಯಕ್ಷೆ ಕುಪ್ಪಣಮಾಡ ನಿವ್ಯಕಾವೇರಮ್ಮ ಕೂಡ್ನನಕೆ ದಾನಿಯ ಕೂಡಿಯಾಡಿತಿಂಜತ್.