ಗೋಣಿಕೊಪ್ಪ, ಮೇ 27(Nadubade News): ಕೊಡವ ತಕ್ಕ್ ಎಳ್ತ್ಕಾರಡ ಕೂಟ ಪಿಂಞ ಗೋಣಿಕೊಪ್ಪ ಕಾವೇರಿ ಕಾಲೇಜ್’ರ ಕೂಟಾದನೆಲ್ ಇದೇ ತಾರೀಕ್ 31ನೇ ಚೆನಿಯಾಚೆ ಪೊಲಾಕ 10-00 ಗಂಟೆಕ್ ಗೋಣಿಕೊಪ್ಪ ಕಾವೇರಿ ಕಾಲೇಜ್’ರ ಸೆಮಿನಾರ್ ಹಾಲ್’ಲ್ ‘ಕೊಡವ ತಕ್ಕ್ ಎಳ್ತ್ಕಾರಡ ಕೂಟ’ತ್ರ ‘ಜನಪ್ರಿಯ ಕೊಡವ ಸಾಹಿತ್ಯ ಮಾಲೆ ಯೋಜನೆ’ಲ್ ಉಳುವಂಗಡ ಕಾವೇರಿ ಉದಯ ಎಳ್ದ್’ನ 190ನೆ ಮೊಟ್ಟ್’ರ , 17 ಎಳ್ತ್ಕಾರ ಎಳ್ದ್’ನ 191ನೆ ಮೊಟ್ಟ್’ರ ಪಿಂಞ ಕೊಟ್ಟಂಗಡ ಕವಿತ ವಾಸುದೇವ ಎಳ್ದ್’ನ 192ನೇ ಮೊಟ್ಟ್’ರ ಪುದಿಯ ಮೂಂದ್ ಪುಸ್ತಕ ಬೊಳಿಪಡ್ತುವ , ಸಾಹಿತಿ ಮುದ್ದಿಯಡ ಕುಶ ಪೊನ್ನಪ್ಪ ದತ್ತಿನಿಧಿ ಕಥೆ ಪೈಪೋಟಿರ ಇನಾಮ್ ಕೊಡ್ಪ ಪಿಂಞ ಪಲತರ ಪೈಪೋಟಿ ಕಾರ್ಬಾರ್ ನಡ್ಪ.
‘ಕೊಡವ ತಕ್ಕ್ ಎಳ್ತ್ಕಾರಡ ಕೂಟ’ತ್ರ ಅಧ್ಯಕ್ಷ ಚೆಟ್ಟಂಗಡ ರವಿ ಸುಬ್ಬಯ್ಯಂಡ ಕೊರವುಕಾರಿಕೆಲ್ ನಡ್ಪ ಕಾರ್ಬಾರ್’ಲ್ ಮುಖ್ಯ ಬೆಂದುವಳಾಯಿತ್ ಕಾವೇರಿ ಎಜುಕೇಷನ್ ಸೊಸೈಟಿರ ಅಧ್ಯಕ್ಷ ಮಂಡೇಪಂಡ ಸುಗುಣ ಮುತ್ತಣ್ಣ, ಗೋಣಿಕೊಪ್ಪ ಕಾವೇರಿ ಕಾಲೇಜ್’ರ ಪ್ರಿನ್ಸಿಪಾಲ್ ಡಾ.ಮಾಳೇಟಿರ ಕಾವೇರಪ್ಪ , ಪುಸ್ತಕ ಪಣದಾನಿಯಳಾನ ಕೈಬುಲೀರ ಪಾರ್ವತಿ ಬೋಪಯ್ಯ, ಮೇಚಮಡ ಮಲ್ಲಿಗೆ ಪೂವಮ್ಮ, ಮುದ್ದಿಯಡ ಪದ್ಮ ಕುಶಾಲಪ್ಪ, ಚಿಂಡಮಾಡ ಸರಿತ ಅಶೋಕ್, ಎಳ್ತ್ಕಾರ್ತಿಳಾನ ಉಳುವಂಗಡ ಕಾವೇರಿ ಉದಯ ಪಿಂಞ ಕೊಟ್ಟಂಗಡ ಕವಿತ ಬೋಜಮ್ಮ ಕೂಡಿಯಾಡುವ.
ಜಾತಿ ಧರ್ಮತ್ರ ನಿರ್ಕ್ ಇಲ್ಲತೆ ಕೊಡವ ಭಾಷೆ, ಸಾಹಿತ್ಯತ್ರ ಅಭಿಮಾನಿಯ ಎಲ್ಲಾರೂ ಈ ಕಾರ್ಬಾರ್’ಲ್ ಕೂಡಿಯಾಡೊಲೂಂದ್ ಕೊಡವ ತಕ್ಕ್ ಎಳ್ತ್ಕಾರಡ ಕೂಟತ್ರ ಪ್ರಕಟಣೆಲ್ ಅರಿಚಿಟ್ಟಿತ್.