ವಿರಾಜಪೇಟೆ, ಮಾ.05: ಕೊಡವ ಕೊಡವಾಮೆರ ವಿಚಾರತ್, ಕೊಡವಡ ನೇರ್ ನಲ್ಲಾಮೆ, ಬಾಳ್ ಬವುಸ್, ಮಕ್ಕಡ ಓದೋ ಎಳ್ದೋ, ಆಟ್ ಪಾಟ್, ಪದ್ದತಿ ಪರಂಪರೆ, ಆಯಿಮೆ ಕೊಯಿಮೆ, ನಡ್ಪು ನುಡ್ಪು, ಕಳಿ ತೆಳಿರ ಅರಿವು, ತಿರಿವು, ಸೇವೆ ಸಾಕಾರನ ಜನಾಂಗಕ್ ಮಾಡ್ಯಂಡ್, ಕೊಡವಾಮೆರ ಕೋವುಲ್ ಒರ್ಪಾಯಿತ್ ನಿಪ್ಪ ಏತುಲ್, ಕೊಡವ ಎಜುಕೇಷನ್, ಕಲ್ಚರಲ್ ಪಿಂಞ ಸ್ಪೋರ್ಟ್ಸ್ ಟ್ರಸ್ಟ್ ಎಣ್ಣುವ ಸಂಸ್ಥೆನ ಮಾರ್ಚ್ 01, 2025ಲ್ ನೋಂದಣಿ ಮಾಡಿತ್ಂದ್ ಟ್ರಸ್ಟ್ರ ಪದಾಧಿಕಾರಿಯ ಎಣ್ಣಿತ್.
ಟ್ರಸ್ಟ್ರ ಕೊರವು ಕಾರನಾಯಿತ್ ಚೇನಂಡ ಗಿರೀಶ್ ಪೂಣಚ್ಚ, ಕೂಡ್ಕೊರವುಕಾರಿ ಆಯಿತ್ ಕಾನತಂಡ ಭೀನಾಜಗದೀಶ್, ಕಾರ್ಯಕಾರನಾಯಿತ್ ಬಾಳೆಯಡ ಪ್ರತೀಶ್ ಪೂವಯ್ಯ, ಕಾರ್ಯ ಕೂಡ್ಕಾರಂಗಳಾಯಿತ್ ಕ್ಯಾ. ಬಿದ್ದಂಡ ನಾಣಿ ದೇವಯ್ಯ, ಪಟ್ಟಡ ಮನು ರಾಮಚಂದ್ರ, ಅಜ್ಜೇಟಿರ ವಿಕ್ರಂ ಅವು ಕಾರ್ಬಾರ್ ಮಾಡುವ.
ಈ ಟ್ರಸ್ಟ್ ಮಿಂಞಕ್ ಕೊಡವ ಮಕ್ಕಕ್ ಓದೋಕ್ ಸಾಯ, ಆಟ್ ಪಾಟ್ ಪಡ್ಪುಚಿಡುವೋ, ಕಳಿ ಓಟ್ಕ್ ಒತ್ತಾಸೆ ಕೊಡ್ಪೊ, ಸೌಕ್ಯ ಇಲ್ಲತಯಿಂಗಕ್ ಸಾಯ ಮಾಡುವೋ ಇನ್ನನೆ ತರಾವರಿ ಬಾಬ್ಲ್ ಕೊಡವಾಮೆರ ಸೇವೆ ಮಾಡೋಕ್ ಕೈ ತೆಕ್ಕಿತ್.
ಆ ಪೋಲೆ ಈ ಕಾಲ ಕೊಡವುರ ಎಲ್ಲಾ ಕಡೆಂಜ ಆಂಜಡ್ತ ಅಂಜಿ ಗರೀಬ ಕೊಡವ ಮಕ್ಕಕ್, ಕಾಲತ್ರ ಪೀಸ್, ಬಟ್ಟೆ, ಬಸ್ರ ಕರ್ಚಿನ ಕೊಡ್ತಿತ್ ಒತ್ತಾಸೆ ಕೊಡ್ಪದಲ್ಲತೆ, ಕೊಡವುಕ್ ಏರ ಮಾರ್ಕ್ ಎಡ್ಪ ಮೂಂದ್ ಕೊಡವ ಮಕ್ಕಕ್ ಪುರ್ಡ್ ಪಣ ಕೊಡ್ಪದುಂಡ್.
ಕೊಡವಾಮೆರ ಪೆರ್ಮೆ, ನೇರ್ ನೆಲೆರ ಬೀರ್ಯಕೊತ್ತಿತುಳ್ಳ ನಂಗಡ ಆಟ್, ಪಾಟ್, ಊಣ್ ತೀನಿ, ಪೋಕ್ ಪೊರ್ಪಾಡ್ನ ಕಾತ್ ಬೆಚ್ಚಿತ್, ಉಳ್ತಿ ಬೊಳ್ತುವಕ್ ಅರಿವು ಕೊಡ್ಪಕಾಯಿತ್, ಮಿಂಞಕ್ ಬೋರೆ ಬೋರೆ ಸಂಘಟನೆ, ಸಮಾಜ, ಊರ್, ನಾಡ್, ಒಕ್ಕತ್ರ ಕೂಡ್ ಕೂಟತ್, ಆಟ್, ಪಾಟ್, ಪೊರಪಾಡ್ ಅರಿವು ಪಡಿಪುರ ಕಾರ್ಬಾರ್ ಮಾಡುವ.
ಕೊಡವಡಲ್ಲಿ ಇಪ್ಪರಕ್ ಹಾಕಿ, ಕ್ರಿಕೇಟ್, ವಾಲಿಬಾಲ್, ಕೇರ್ ಬಲಿರನ್ನತ ಕಳಿಕೂಟ ದುಂಬಾ ಚಾಯೋಡೆ ನಡ್ಂದಂಡ್ ಉಂಡ್. ಆಚೇಂಗಿ ಇದಂಡ ಕೂಟ್ಕ್ ಓಡೋ, ಪಾರೋ, ಖನಕಲ್ಲ್ ಕನಿಪೋ ಕೂಡ್ನನಕೆ ಫಲತರ ಕಳಿಕೂಟ ನಂಗಡ ತಡಿನ ಗಟ್ಟಿಮುಟ್ಟಾಯಿತ್ ಬೆಪ್ಪಕ್ ಸಾಯ ಮಾಡುವ ಈ ನ್ಟ್ಟ್ಲ್, ಬಪ್ಪ ಡಿಸೆಂಬರ್ 27 ಪಿಂಞ 28ಕ್ ನಾಪೋಕ್ಲ್ ನಾಡ್ಲ್, ಮಿನಿ ಕಳಿ ನಮ್ಮೆ(ಮಿನಿ ಒಲಂಪಿಕ್ ಮಾದರಿ) 100,200,400,ಮೀಟರ್ ಓಡುವೋ, 5000 ಮೀಟರ್ ಕುಂದ್ ಕಾಡ್ ಓಟ್, 4×4 ರಿಲೇ, ಖನ ಕಲ್ಲ್ ಕನಿಪೊ, ಟೆನ್ನಿಸ್, ಹಾಕಿ, ಕ್ರಿಕೇಟ್ ಕೂಡ್ನನಕೆ ತರಾವರಿ ಆಯಿಮೆ ಕೊಯಿಮೆ ನಡ್ತೊದುಂಡ್.
ಕೊಡವಾಮೆರ ಕೋವುಲ್, ದೇಶ ಮಾಜನಡ ನೇರ್ ನಲ್ಲಾಮೆಕಾಯಿತ್ ನೈಪಕ್ ಮೊಳಿಯಾನ ಈ ಟ್ರಸ್ಟ್ಕ್ ಮಾಜನಡ ಎಲ್ಲಾ ತರತ ಅರಿವು, ತಿರಿವು, ಆರಬೇರ ಇಂಜಿತ್, ಒತ್ತೋರ್ಮೆರ ಒತ್ತಾಸೆ ಇಕ್ಕಡ್ಂದ್ ಕೊಡವ ಎಜುಕೇಷನ್, ಕಲ್ಚರಲ್ ಪಿಂಞ ಸ್ಪೋರ್ಟ್ಸ್ ಟ್ರಸ್ಟ್ ಕೇಟಂಡಿತ್.