ಸಂಪಾದಕೀಯ: ಮಾ.02:- ಕಳ್ಳ್ ಕುಡಿಕೊಂಡು ಬಾವಾ…! ಕಳ್ಳೇ ನಂಗಡ ದೇವಾ….! ಎಣ್ಣೋದೋರ್ ಪಾಟ್ 1980ನೇ ದಶಕತಿಂಜ ಇಂದೆಕೂ ಕೊಡವುಲ್ ಭಾರೀ ಸದ್ದ್ ಮಾಡ್ಯಂಡುಂಡ್. ಆಚೇಂಗಿ ಈ ಪಾಟ್ ಎಳ್ದಿತ್ ಪಾಡ್ನವು ಮಾತ್ರ ಒಮ್ಮಲೂ ಕಳ್ಳೇ ಕುಡ್ಚಿತಿಲ್ಲೆ ಎಣ್ಣೋದ್ ಇಂಞೋರ್ ತಮಾಷಿ.
ಆಚೇಂಗಿ ಈ ಕಳ್ಳ್ಕೊತ್ತನಕೆ ಎನ್ನೇಂಗೋರ್ ತಕರಾರ್, ಸರ್ಕಾರತ ನೇಮ ನಿರ್ಕ್ ಬಂದಕ್ಕ, ಕೊಡವಡ ಆಯಿಮೆ ಕೊಯಿಮೆ, ಅದತೂ ಕೊಡವ ಮಂಗಲತ್ ಕಳ್ಳ್ ಬಳ್ಂಬುವ ವಿಚಾರಕ್ ತೋಪರೆ ಬಂದಕ ಎಂತೂ ಕೊಡಗ್ಲ್ ಅದೂ ಕೊಡವಡಲ್ಲಿ ಭಾರೀ ಚರ್ಚೆ, ವಿಚಾರ ವಿಮರ್ಷೆ ನಡ್ಪ. ಅದ್ ಪರ ವಿರೋಧ, ವಾದ ವಿವಾದ ಆಪದೂ ಇಪ್ಪ.
ಅನ್ನತದೇ ಓರ್ ವಿಚಾರ ಚೆನ್ನಂಗ್ ದಿನಕಿಪ್ಪರ ಭಾರೀ ಸುದ್ದಿಯಾಚಿ, ಮಾರಮಳೆಲ್ ಭೀರಂಗಾಳಿ ಬೀಜಿತ್ ಸದ್ದಡಂಗಿ ಪೋನನ್ನಕೆ ಈ ವಿಚಾರವೂ ಸದ್ದಡಂಗಿ ಪೋಚಿ ಎಣ್ಣುವದ್ ಬೇರ ಪಡುವ ವಿಚಾರ.
ಕೊಡವುಲ್ ಏದೆ ಮಂಗಲ ಕಂಬಳ, ಆಯಿಮೆ ಕೊಯಿಮೆಲ್, ಕಳ್ಳ್ ಕೂಟೋಂಡುವೇಂಗಿ, ಸರ್ಕಾರತ ನೇಮಕೊತ್ತಿತ್ ಓರ್ ದಿನತ್ ಲೈಸೆನ್ಸ್ ಎಡ್ತವಂಡೂ(CL5) ಇದಂಗ್ ಓರ್ ನಾಳ್ಕ್ 11000 ಚಾರ್ಜ್ ಕೆಟ್ಟೋಂಡೂಂದ್ ಅಭಕಾರಿ ಡಿಸಿ ಅವು ಮಾಡ್ನ ಆದೇಶ ಪೊರಬಂದದೇ, ಕೊಡವುಲೇ ಅಲ್ಲತೆ ಕೊಡವ ನೆಲೆ ನಿಂದಲ್ಲಿ ಎಲ್ಲಲ್ಲಿಯೂ ಭಾರೀ ಚರ್ಚೆ ನಡ್ಂದತ್. ಅದತೂ ಸಾಮಾಜಿಕ ಕಾರ್ಯಕರ್ತ ಸರ್ಕಂಡ ಸೋಮಯ್ಯ ಅವು ಮಾಡ್ನ ಓರ್ ಆಡಿಯೋ, ಸಾಮಜಿಕ ಮಾದ್ಯಮತ್ ಭಾರೀ ಸದ್ದ್ ಮಾಡಿತ್, ಎಲ್ಲರೂ ಈ ತಕ್ಕ್ ನೇರ್ ಎಣ್ಣುವನ್ನಕೆ, ಒತ್ತಾಸೆನೂ ಕಾಟ್ಚಿ.
ಸರ್ಕಂಡ ಸೋಮಯ್ಯ ಅಯಿಂಗಡ ಇರಾದೆ ಪೋಲೆ, ಕೊಡವಡ ಎಲ್ಲಾ ಆಯಿಮೆಲೂ ಕಳ್ಳ್ ಕೂಟುವಾನ ನಿಪ್ಪುಚಿಡೋಂಡೂ, ಇನ್ನನೆ ಮಾಡ್ನಕ ನಂಗಡ ಆಯಿಮೆಕೋರ್ ಅರ್ಥಬಪ್ಪ, ಅಲ್ಲತೆ ಗರೀಬಂಗ ಸಾಲ ಸೋಲ ಮಾಡಿತ್ ಕಳ್ಳ್ ಕೂಟ್ವದಲ್ಲತೆ, ಮಂಗಲತಂತ ಕಾರ್ಬಾರ್ಲ್ ದಂಡ್ ದಿನ ಕಳ್ಳ್ ಕೂಟೋಂಡುವೇಂಗಿ ಸುಮಾರ್ 25000 ಸರ್ಕಾರಕ್ ಅನುಮತಿಕಾಯತ್ ಕೆಟ್ಟೋಂಡು. ಇದ್ ಪಾಪತ ಬಡವಂಗಕ್ ಬಲ್ಯ ತೊಂದರೆ ಆಪ. ಅನ್ನನೆ ಆಯಿತ್ ಅಖಿಲ ಕೊಡವ ಸಮಾಜ, ಕೊಡವ ಸಮಾಜ ಒಕ್ಕೂಟ, ಎಲ್ಲಾ ಸಂಘ, ಸಂಸ್ಥೆ ಸಮಾಜಕಾರ ಕೂಡಿತ್, ಮೋಪು ಕೂಟ ಮಾಡಿತ್, ತಕ್ಕ್ ಬಾಕ್ ಮಾಡಿತ್, ಓರ್ ತೀರ್ಮಾನಕ್ ಬಂದಕ, ಎಲ್ಲಾರ್ಕೂ ಅನುಕೂಲ ಅಕೂಂದ್ ಕೇಟಂಡಿತಿಂಜತ್. ಈ ಅಭಿಪ್ರಾಯಕ್ ಭಾರಿ ಒತ್ತಾಸೆ ಎನ್ನೋ ಬಾತ್ ನೇರೆ, ಆಚೇಂಗಿ ಅಲ್ಲಿಂಜ ಮಿಂಞಕ್ ಎಂತಾಚಿ, ಎಂತಾಂಡು, ಎಂತಾಪ ದಾರ್ಕೂ ಗೊತ್ತಿಲ್ಲೆ. ದಾರ್ ಈ ವಿಚಾರತ್ ತಕ್ಕ್ ಪರಿಯೋಂಡಿಂಜತೋ ಅಯಿಂಗಡ ಸದ್ದಿಲ್ಲೆ. ಇದೂ ಇಕ್ಕಣೆಕ್ ಆನನೆಕೆ “ಪರ್ಂದತ್ ಮರ್ಂದತ್” ಎಣ್ಣೊನ್ನಕೆ ಆಚಾಂದೋರ್ ಬೇರ.
ಆಚೇಂಗಿ ಈ ವಿಚಾರ ಕಳ್ಳ್ಕ್ ಸಮ್ಮಂದ ಪಟ್ಟದ್ ಆಯಿತುಳ್ಳಾನಕೊಂಡ್, ಜನಕೋರ್ ಬೇರ ಮಿಂಞಕ್ ಎಂತಾಕೂಂದ್. ಅಂದಕ ಕಳ್ಳ್ ನಂಗಕ್ ಅನಿವಾರ್ಯವಾ ಅಲ್ಲಾ ಅವಶ್ಯವಾಂದ್ ಕೇಟಕ, ಸುಮಾರಾಳ್ರ ಅಭಿಪ್ರಾಯ ಕಳ್ಳ್ ನಂಗಕ್ ಅನವಾರ್ಯ, ಕೊಡವಡ ಏದೇ ಪದ್ದತಿ ಪರಂಪರೆ, ಆಯಹಿಮೆ ಕೊಯಿಮೆಲೂ ಕಳ್ಳ್ ಕೂಟತೆ ಕಾರ್ಬಾರೇ ನಡ್ಪುಲೆ. ನಂಗ ಪೂಜುವ ಅಜ್ಜಪ್ಪ ಕಾರೋಣಂಗೂ ನಂಗ ಆದ್ಯ ಕಳ್ಳ್ಂಗರಿ ಬೆಚ್ಚಿತೇ ನಂಗಡ ನಲ್ಲಾದ್ ತೀಯಾಂಗ್ ಮೊಳಿ ಇಡುವೊ. ಇನ್ನನೆ ಉಳ್ಳಲ್ಲಿ ನಂಗ ಕಳ್ಳ್ ನಿಪ್ಪುಚಿಡನಾ ಎಣ್ಣುವದ್ ಕಾರೋಣ ಮೆಚ್ಚುವ ತಕ್ಕಾ…!? ಅದತೂ ಕೊಡವುರನ್ನತ ಏರ ತಂಪು, ಕುಳ್ರ್ ಉಳ್ಳ ಜಾಗತ್ ಕಳ್ಳ್ ಪುಳಿ ಇಲ್ಲತೆ ಇಪ್ಪದುಂಡಾ ಇದೆಲ್ಲ ಆಪ ಪೋಪದಾಂದ್ ವಾದ ಮಾಡ್ವಯಿಂಗಡ ಸಂಖ್ಯೆ ಒಂದೂ ಕಮ್ಮಿಲಿಲ್ಲೆ.
ಅಕ್ಕು ನೇರೇ, ನಂಗಡ ಅಜ್ಜಪ್ಪ ಕಾರೋಣಂಗ್ ನಂಗ ಕೊಡ್ಪ ನೈವೇದ್ಯ ಪ್ರಸಾಧ, ಮೀದಿ ನೀರ್, ಕಳ್ಳ್ ಕರಿ. ಕಳ್ಳಿಲ್ಲತೆ ನಂಗಡ ಮೂಲ ಪುರುಷಂಗಡ ಆತ್ಮಕ್ ತಣು ದಕ್ಕುಲೆ ಎಣ್ಣುವದ್ ನಂಗಡ ನಂಬಿಕೆ. ಇದ್ ಸತ್ಯ ಕೂಡ. ಆಚೇಂಗಿ ನಂಗಡ ಅಜ್ಜಪ್ಪ ಕಾರೋಣಂಗ ಏದ್ ಕಳ್ಳ್ನ ಕೊದಿಪಯಿಂಜತ್, ನಂಗ ಅಯಿಂಗಕ್ ಏದ್ ಕಳ್ಳ್ನ ಮೀದಿ ಬೆಕ್ಕೂಂಡು…!?
ಇಂದ್ ಏದೇದೋ ಪೆದತ್ ಬಂದಂಡುಳ್ಳ ಏದೇದೋ ಕೆಮಿಕಲ್ ಇಟ್ಟ ರಂಗ್ ರಂಗ್ರ ಕಳ್ಳಲ್ಲ. ಅದ್ ನಂಗಳೇ ಕಾಚುವಯಿಂಜ, ತರಾವರಿ ಏದೇ ಕೆಮಿಕಲ್ ಇಡತ ಕಾಚಿಂಗಳ್ಳ್ ಪಿಂಞ ಬೋಳ್ಳೆಕಳ್ಳ್. ಅದೂ ತೊಂಡೆರ ಕೊತ್ತ್ಕೆತ್ತನೆ ಅಲ್ಲ, ಅದಂಗೂ ಓರ್ ಅಳ್ತೆ ಇಪ್ಪಯಿಂಜತ್. ನಂಗ ಇಂದ್ ಮಾಡ್ಯಂಡುಳ್ಳದ್ ಎಂತ, ಏದ್ ಕಳ್ಳ್ನ, ಎಚ್ಚಕ್, ಎನ್ನನೆ ಬೂಕಿಬೆಪ್ಪ, ಇದ್ ನಂಗಡ ಕಾರೋಣಂಗ್ ತೃಪ್ತಿ ಆಕುವಾ… ಒಮ್ಮ ಬೇರ್ಚಿಟ್ಟ್ ನೋಟನ ಅಲಾ…
ಅಂದಕ ಕಳ್ಳ್ ಬೋಂಡ ಎಣ್ಣುವದ್ ಈ ಎಳ್ತ್ರ ಉದ್ದೇಶವಾ ಕೇಟಕ, ಕಂಡಿತಾ ಅಲ್ಲ. ಕೊಡವ ಪರಂಪರೆಲ್ ಎಂದೆಕೂ ಕಳ್ಳ್ ಕರಿನ ಇಲ್ಲತೆ ಮಾಡೋಕ್ ಸಾಧ್ಯವೇ ಇಲ್ಲೆ. ನಂಗಡ ಮೂಲ ಕಾರೋಣಂಗ್ ಮೀದಿ ನೀರ್, ಕಳ್ಳ್ ಕರಿ ಬೆಚ್ಚಿತೇ ಆಂಡು. ಆಚೇಂಗಿ ಏದ್ ಎನ್ನನೇ ಎಣ್ಣುವದಚ್ಚಕೇ ಇಲ್ಲಿ ವಿಷ್ಯ.
ಅಕ್ಕು ಪಂಡೇತ ಮಾದ್ರಿ ಕಾಚಿಂಗಳ್ಳ್ ಇಲ್ಲೆ, ಬೊಳ್ಳೆ ಕಳ್ಳೂ ಬ್ಯಾನಾಯಿತ್, ಅದಂಗಾಯಿತ್ ನಂಗ ಕಂಪೆನಿ ಕಳ್ಳ್ಕೇ ಒಗ್ಗಿಪೋಯಿತ್ ನೇರ್. ಈ ಕಂಪೆನಿ ಕಳ್ಳ್ನೇ ಬೆಪ್ಪದಾಚೇಂಗೂ ನಂಗಕ್ ಓರ್ ಅಳತೆ ಬೋಂಡುವಲ್ಲ, ನಂಗಡ ಬಲ್ಯರಿಕೆನ , ಪಣತ್ರ ತಾಕತ್ತ್ನ ಕಾಟುವ ಬಿರ್ಸ್ಲ್ ಊರ್ಡಿಯ ಮೂಕ್ಮಟ್ಟ ಬೂಕಿತ್ ಅಯೆಪಾಂಗಿಂಜ ಓರ್ ಅಳತೆಲ್ ಎಲ್ಲಾರ್ಕೂ ಸಮಧಾನ ಆಪನ್ನಕೆ ಬೂಕಿ ಕೊಡ್ತಕ ನಂಗಡ ಆಯಿಮೆಕೂ ಅರ್ಥ ಬಕ್ಕೂ.ಮಿಂಞಕ್ ಕಾರ್ಬಾರ್ ಮಾಡುವ ಪಾಪತೈಂಗಕೂ, ಅನುಕೂಲ ಆಕು ಎಣ್ಣುವ ಇರಾದೆ.
ಇನ್ನನಾಯಿತ್ ನಂಗಡ ಎಲ್ಲಾ ಆಯಿಮೆ ಕೊಯಿಮೆಲೂ ಕಳ್ಳ್ ಅವಶ್ಯವೇ ನೇರ್, ಆಚೇಂಗಿ ಇಂತದೇ ಬ್ರಾಂಡ್ರ ಕಳ್ಳಾಂಡು, ಇಚ್ಚಕೇ ಕೇಸ್ ಕಳ್ಳಾಂಡೂ ಎಣ್ಣುವಾಂಗಿಂಜ, ನಾಡ್ ಮಟ್ಟತ್ ಏದೇ ರೀತಿರ ಆಲ್ಕೋಹಾಲ್ ಕಂಟೆಂಟ್ ಇಲ್ಲತೆ ತರಾವರಿ ಕಳ್ಳ್ ತಯಾರಾಪ. ನಾಡ್ಕಾರಳೇ ಎಚ್ಚಕೋ ತರತ ನಾಡ್ ಕಳ್ಳ್ ತಯಾರ್ ಮಾಡುವ, ಇದನ ಪಂಡ್ ನಾಡ್ ಸರಾಯಿ ಎಣ್ಣುವಿಂಜತ್. ಇಕ್ಕ ವೈನ್ ಎಣ್ಣುವ ಅಚ್ಚಿಕೆ. ಇಂತ ಕಳ್ಳ್ನ ಬಳತ್ನಕ, ನಾಡ್ರ ಜನಕ್ ಉದ್ಯಮ ಆನನಕೆಯೂ ಆಕೂ, ನಂಗಡ ತಡಿರ ಆರೋಗ್ಯಕೊತ್ತ ಕಳ್ಳ್ನ ಕುಡ್ಚನೆಕೆಯೂ ಆಕೂ…!
ಇಂತ ಕ್ರಾಂತಿಕಾರಿ ಬದಲಾವಣೆ ಆಕೋಂಡುವೇಂಗಿ, ಒಬ್ಬ ದಂಡಾಳ್ ಅಥವಾ ಗರೀಬ ಸ್ಥಿತಿರ ಜನಳುಂಡ್ ಕಯ್ಯುಲೆ. ಇದಂಗ್ ಬಲ್ಯ ಮಟ್ಟತ ಜನಜಾಗೃತಿ ಆಕೋಂಡು, ಗಡಿ ಗಡಿ ಮೋಪು ಕೂಟ ನಡ್ಕೋಂಡು, ಎಲ್ಲಾಡಲ್ಲಿ ಅರಿವು ಕೊಂಡಬಪ್ಪ ಕಾರ್ಯ ಆಕೋಂಡು. ಅನ್ನನೆ ಆನಕ ಮಾತ್ರ ಮಿಂಞಕೋರ್ ನಾಳ್ ಕಂಪೆನಿ ಕಳ್ಳ್ ಇಲ್ಲತ, ತಡಿಕ್ ತಾಪತ್ರೆ ತರತ ಕಳ್ಳ್ ಕುಡಿಪಕಾಕೂ. ಅದೆಲ್ಲಂಗಿಂಜ ಸರ್ಕಾರತ ಇಚ್ಚಕ್ ಬಲ್ಯ ಮಟ್ಟತ ತೆರಿಗೆ ಕಟ್ಟಿತ್, ಪಾಪತ ಗರೀಬಂಗ ಸಾಲ ಸೋಲ ಆಯಿತ್ ಪಾಪರ್ ಆಪದೂ ನಿಕ್ಕು.
ಏದಂಗೂ ಸಂಘ, ಸಂಸ್ಥೆ, ಸಮಾಜ, ಸಂಘಟನೆಕಾರ, ಅರಿಯವು ಪೆರಿಯವು ಅಳ್ತಿ ಪರ್ಂದಿತ್, ಕೂಟಿ, ಕಳ್ಂದಿತ್, ಓರ್ ತೀರ್ಮಾನಕ್ ಬಂದಿತ್, ಓರ್ ಪೋಲೆ ಜನಡಲ್ಲಿ ಅರವು ಕೊಂಡಬಂದಕ, ನಾಡ್ಕ್, ಜನಾಂಗಕ್, ಸಂಸ್ಕೃತಿಕ್, ಸಮಾಜಕ್ ಸರ್ಕಾರಕ್ ಎಲ್ಲಾಂಗೂ ಅನುವಾಕೂ, ಎಲ್ಲಾರ್ಕೂ ನಂದಾಕೂ…