- ಚಾಮೆರ ದಿನೇಶ್ ಬೆಳ್ಯಪ್ಪ,
ನಡುಬಾಡೆ, ಏ.22: ಕೊಡವ, ಕೊಡವಾಮೆ ಉಳ್ಂಜಿ ಬೊಳಿವಲ್ಲಿ ಲಗಾಯಿತೊಟ್ಟ್ ಇಂದಾಕಣೆಕೂ, ಕಾರೋಣಂಜಿ ತೊಟ್ಟ್ ಕ್ಕ್ಕ್ರಂಗತ್ತನೆಯೂ ನೈಪು ಒರ್ಪು ಉಂಡ್. ಅದ್ ತಕ್ಕ್ ಬಾಕ್, ಆಯಿಮೆ ಕೊಯಿಮೆ, ಪದ್ದತಿ ಪರಂಪರೆ, ಆಸ್ತಿ ಪಾಸ್ತಿ, ಪಡೆ ಪೋರ್, ಇನ್ನನೇ ಓರೋರ ಕೋವುಲ್, ಓರೋರ ನೈಪು ಉಂಡ್. ಕೊಡವಾಮೆರ ಕೋವುಲ್ ಆಣ್ಪೊಣ್ಣ್ ಎಣ್ಣುವ ನಿರ್ಕಿಲ್ಲತೆ ಎಲ್ಲರೂ ಅದದ್ ಕೋವುಲ್ ನೈಚಿ ನೇಡ್ನವೇ…
ಪಂಡ್ತೊಟ್ಟ್ ಇಂದಾಕಣೆಕೂ ಎಂಗಡ ಪೊರಪಾಡ್ಲ್ ಇವು ಕೊಡವಾಂದ್ ಕಂಡರಿವೇಂಗಿ, ಅಲ್ಲಿ ಎಂಗಡ ಪೊಮ್ಮಕ್ಕಡ ಪಾಲ್ ಏರ ಪಿಂಞ ಅದೇ ನಂಗಕ್ ತಗರ್ಧಿಯೂ ಅಕ್ಕೂ.
ಇದಂಗ್ ಏತುವಾಪನ್ನಕೆ ಕೊಡಿಲುಳ್ಳ ಚಿತ್ರಪಟತ್ನ ನೋಟ್ನಕ ಅರಿಯು. ಸಾಮಾಜಿಕ ಮಾದ್ಯಮತ್ ವೈರಲ್ ಆಯಂಡುಳ್ಳ ಈ ಪಟ 1910ಲ್ ಮಡಿಕೇರಿರ ಸೆಂಟ್ ಜೋಸೇಫ್ಸ್ ಕಾನ್ವೆಂಟ್ಲ್ ಎಡ್ತದ್ಂದ್ ಎಣ್ಣಿತ್. ಆ ಪಟತ್ನ ಒಮ್ಮ ಕಿಕ್ಕಿ ನೋಟ್ನಕ ಅಲ್ಲಿ ಆಮಕ್ಕಳೂ ಉಂಡ್ ಪೊಮ್ಮಕ್ಕಳೂ ಉಂಡ್. ಆಚೇಂಗಿ ಆಮಕ್ಕಳ ನೋಟ್ನಕ ದಾರ್ ಅಲ್ಲಿ ಕೊಡವೋ ಎಣ್ಣುವದ್ ಅರಿವಾಪುಲೆ. ಅದೇ ಅಲ್ಲಿ ಪೊಮ್ಮಕ್ಕಳ ನೋಟಿ, ಅಚ್ಚಕೂ ಮಕ್ಕಡ ಎದಿಕೆ ಕೊಡವತಿ ಪೊಡಿಯ ಎದ್ದೆಲಂಗಿ ಕಾಂಬ.
ಇದಂಡ ಅರ್ಥ ಪಂಡ್ತೊಟ್ಟ್ ಇಂದೆಕೂ ಕೊಡವಾಮೆ ಎಲಂಗಿ ಬಾವನ್ನಕೆ ಮಾಡುವಾತ್ ಪೊಮ್ಮಕ್ಕಡ ಪಾಲ್ ಏರ. ಅನ್ನನೇಂದ್ ಆಮಕ್ಕ ಒಂದು ಮಾಡಿತೇ ಇಲ್ಲೆಯಾ, ಪೊಮ್ಮಕ್ಕ ಮಾಡ್ನದ್ ಎಲ್ಲಾ ಸೆರಿಯಾ ಕೇಟಕ ಕಂಡಿತಾ ಇಲ್ಲೆ. ಪೊಮ್ಮಕ್ಕಳಿಂಜನೂ ಕೊಡವಾಮೆಕ್ ಸುಮಾರ್ ವಿಚಾರತ್ ತೋಪರೆ ಆಯಿತ್, ಆಮಕ್ಕಳೂ ಕೊಡವಾಮೆನ ಎಡ್ತ್ ಕೊಂಡಾಡಿತ್ ನೇರ್. ಇಲ್ಲಿ ವಿಚಾರ ಉಳ್ಳದ್ ಪೊರಪಾಡ್ರ ಮಾತ್ರ.
ನಂಗ ಆಮಕ್ಕ ಪದ್ದತಿ ಪರಂಪರೆ, ಆಯಿಮೆಕೊಯಿಮೆ, ಉಡ್ಪುಂಗೊಡ್ಪುರ ವಿಚಾರ ಬಂದಕ, ಆದ್ಯತ್ ನಂಗ ಕೈ ಕಾಟೋ, ಕುತ್ತಿ ಪರಿಯೋ, ಪೊಮ್ಮಕ್ಕಳನೇ, ಅವು ಬಿರ್ಚಿ ಮಂಡೆ ಬುಟ್ಟತ್, ಅವು, ನೆತ್ತಿಕ್ ಕುರಿ ಇಡುಲೆ, ಅವು, ಕೊಡವ ತಕ್ಕ್ಂಜಿ ಏರ ಇಂಗ್ಲೀಷ್ ಪರಿಯುವ, ಅನ್ನನೆ ಇನ್ನನೇಂದ್. ಇದೆಲ್ಲ ಸುಮಾರ್ಕ್ ನೇರೇ.
ಆಚೇಂಗಿ, ಪೊರಪಾಡ್ರ ವಿಚಾರಕ್ ಬಾತೇಂಗಿ ನಂಗ ಆಮಕ್ಕ ಪೊಮ್ಮಕ್ಕಳ ನೋಟಿತ್ ಪಡಿಕಂಡಿಯದ್ ಬಾರೀ ಉಂಡ್ ಎಣ್ಣುವಾನೂ ಅರ್ಂಜವಂಡು.
ಕೊಡಿಯತ ಪಟತೇ ನೋಟಿ ಅಲ್ಲಿ ಕೊಡವ ಕ್ಣ್ಣ್ ಮಕ್ಕ ಉಂಡಾ ಇಲ್ಲೆಯಾಂದೇ ಗೊತ್ತಾಯಂಡಿಲ್ಲೆ, ಕೊಡವತಿ ಮೂಡಿ ಮಕ್ಕ ನೋಟಿ ಎನ್ನನೆ ಎಲಂಗಿಯಂಡುಂಡ್. ಇಂದ್ ಅವು ದಾರೂ ಇಪ್ಪಕ್ಕಿಲ್ಲೆ ಆಚೇಂಗಿ ಅವು ಕಾಟಿ ತಂದ ಬಟ್ಟೆ ಉಂಡಲಾ ಅದ್ ನಂಗಕ್ ಬೊಳಿಯಾಂಡು.
ಇಂದ್ ಕಾಲತ ವಿಚಾರಕ್ಕೇ ಬಕ್ಕನ, ಇಂದ್ ನಂಗಡ ಪೊಮ್ಮಕ್ಕ ಎಲ್ಲೇಂಗೋರ್ ನಾಲ್ ಜನ ಕೂಡುವಲ್ಲಿಕ್, ಏದೇ ಓರ್ ಆಯಿಮೆ ಕೊಯಿಮೆ ಆಯಂಡುಂಡೇಂಗೂ ಅಲ್ಲಿಕ್ ಪೊಡಿಯ ಉಡ್ತಿತೇ ಬಪ್ಪ. ಅದ್ ಮಂಗಲ ಕಂಬಳತಿಂಜ ತೊಟ್ಟ್, ಅವು ಮಾಡುವ ಚಾಕ್ರಿರ ಜಾಗಕೆತ್ತನೆಯೂ ಅವು ಪೆರ್ಮೆಲ್ ಪೊಡಿಯ ಉಡ್ಪ. ಬಾಕಿ ನ್ಯಾರತ್ ಅವು ಏದೇ ಪೊರಪಾಡ್ಲ್ ಇಕ್ಕಡ್ ಆಚೇಂಗಿ ಮನೆಂಜ ಪೊರ್ಮೆ ಕಡ್ಂದಿತ್ ನಾಲಾಳ್ರ ಎದಿಕೆ ಪೋಪೇಂಗಿ ಪೊಡಿಯ ಉಡ್ತಿತೇ ಪೋಪ. ಎಲ್ಲಿಯೋ ನೂರಾಲ್ ಒಬ್ಬ ದಂಡಾಳ್ ಇಕ್ಕೂ ಪೊಡಿಯವೇ ಉಡ್ಕತವು ಆಚೇಂಗಿ ನೂರಾಲ್ 99 ಪೊಮ್ಮಕ್ಕ ಪೊಡಿಯ ಉಡ್ಕತೆ ಏದೇ ಕಾರ್ಬಾರ್ಕೂ ಪೋಪುಲೆ.
ನಂಗ ಆಮಕ್ಕ ನಂಗಕ್ ಮಂಗಲ, ಕಂಬಳ, ಚಾವು, ಮಾದ, ನಮ್ಮೆ ನಾಳ್ ಏದೇ ಆಚೇಂಗೂ ಸುರಾಲ್ ಶರ್ಟ್, ಕೋಟ್ ಬೂಟ್ ಎಲ್ಲಲ್ಲಿಕ್ಕೂ ಒರೇ ಪೊರಪಾಡ್, ಏದೇಂಗಿ ಮಂಗಲಮನೆಲ್ ಕುಪ್ಯ ಇಟ್ಟೈಂಗಳ ಕಂಡಕ, ಒಂದೋ ಅಂವೊ ಸ್ವಂತಕಾರ ಆಯಿತಿಕ್ಕು, ಇಲ್ಲೇಂಗಿ ಇಂವೊ ನೋಟ್ ಬಿಲ್ಡಪ್ಕ್ ಕುಪ್ಯ ಇಟ್ಟಂಡ್ ಬಂದಿತ್ಂದ್ ಮೂಲೆಲ್ ಅಳತಂಡ್ ಕುತ್ತ ಪರಿವಯೈಂಗಡ ಸಂಖ್ಯೆಯೇ ಏರ.
ನಮ್ಮೆ ನಾಳ್ಕ್ ಬುಡಿ ಸುಮಾರೆಲ್ಲ ತಕ್ಕ, ಮುಕ್ಕಾಟಿಯ ತಿರೋಳಕಾರಂಗಳೂ ಸುರಾಲ್ ಶರ್ಟ್ಲೇ ತುಳ್ಳಿಯಂಡಿಪ್ಪ, ಓರಂದ್ ಊರ್ ನಾಡ್ಲ್, ನಮ್ಮೆ ನಾಳ್ ತಿರಿಕೆಲ್ ದೇವಳತ ಅಡಿಕ್ ಬುಡುಲೇಂದೋ, ಇಲ್ಲೆ ಕುಪ್ಯ ಇಟ್ಟ್ಲೇಂಗಿ ದ್ಯಾವ ತಪ್ಪು ಇಡ್ಚಿಡುವಾಂದೋ ಪೋಡಿಲ್ ಪರ್ಕೆ ತೀಪನ್ನಕೆ ಕುಪ್ಯ ಇಡುವೈಂಗಳೂ ಉಂಡ್. ಇದ್ ಬುಟ್ಟಕ ಇಷ್ಟ ಪಟ್ಟಿತ್ ಪೆರ್ಮೆಲ್ ಕುಪ್ಯ ಇಡೋಯೈಂಗಡ ಸಂಖ್ಯೆ ದುಂಬಾ ಕಮ್ಮಿಯೇ. ಆಚೇಂಗಿ ಇಕ್ಕ ಕೊಡಿಕ್ ನೇಂದಂಡುಳ್ಳ ಬಾಲೆಕಾರ ಮಕ್ಕ ಸುಮಾರ್ಕ್ ಪೋಪಲ್ಲಿಕೆಲ್ಲ ಕುಪ್ಯ ಚಾಲೆಲ್ ಪೋಯಿತ್ ನಿಂದಂಡುಂಡ್. ಕಮ್ಮಿ ಎಣ್ಣಕ ಮಂಡೆಕೋರ್ ವಯಿತ್ರನೇಂಗಿ ಕಟ್ಟುವ. ಇದ್ ಬಾಲೆಕಾರ ಕ್ಣ್ಣ ಮಕ್ಕಡ ನಲ್ಲ ಬೊಳ್ಚೆಯೇ ಆಚೇಂಗೂ, ನಂಗಡ ಪೊಮ್ಮಕ್ಕ ಪೆರ್ಮೆಲ್ ಪೊಡಿಯಾಯಿ ಪೋಪನ್ನಕೆ ನಂಗಕ್ ಕಷ್ಟವೇ. ಏತೂ ನಂಗ ಎಚ್ಚಕೋ ಕಾಲ ಬಯ್ಯೇ ಬೋರೈಂಗಳ ಕಾಪಿ ಮಾಡಿಟಿತ್. ಆಚೇಂಗಿ ತಂಗಡ ಭೀರ್ಯತ ತಾಯಿಯ ಅಯಿಂಗಡ ಪೊಡಿಯನ ಬುಟ್ಟ್ಲೆ. ಇಂದೆಕೂ ಅನ್ನೇ ಪೋಯಂಡುಂಡ್.
ಈ ಎಲ್ಲಾಂಗಾಯಿತ್ ಕೊಡವಾಮೆರ ಪೆರ್ಮೆ ನಂಗಡ ಪೊಮ್ಮಕ್ಕ ಎಣ್ಣೋತ್ ದಂಡ್ ತಕ್ಕಿಲ್ಲೆ. ಇನ್ನನೇ ಪೊರಪಾಡ್ರ ಕೂಟ್ಲ್ ಮಕ್ಕಕ್ ಅವ್ವಂಗಳಾನವು, ಕೊಡವ ತಕ್ಕ್ನೋ, ಪದ್ದತಿ ನಡ್ಪುನೋ ಅರಿಚಿಟ್ಟ್ ಬೊಳ್ತ್ನಕ, ಕೊಡವಾಮೆ ಉಲಗತ್ಡಿ ಎದ್ದೆಲಂಗಿ ಬಾವತ್ ಬೇರವೇ ಇಲ್ಲೆ.
ಅಂದ್ ತೊಟ್ಟ್ ಇಂದೆಕೂ ದೇವಕನ್ನಿಯಡ ಜಾಗತುಳ್ಳ ಕೊಡವತಿಯ ಕಾಲಮುಂದಾರ ಕಲ್ಲ್ ಕಾವೇರಿ ಪಿಲ್ಲ್ ಭೂಮಿ ಇಂಜ ನಾಳೋಳ, ದೇವಕನ್ನಿಯಾಯಿತೇ ಬಾವಡ್…. ಕೊಡವಾಮೆರ ಬೀರ್ಯಕೊತ್ತ ತಗರ್ಧಿ ಎಲಂಗಡ್…