✍–ಚೆಪ್ಪುಡೀರ ಕಾರ್ಯಪ್ಪ
ಕೊಡಗ್ಲ್ ಸಾಧಾರಣ ಮಾರ್ಚ್ ಪಿಂಞ ಏಪ್ರಿಲ್ ತಿಂಗ ಎಣ್ಣನ ಕಳಿಕೂಟ ನಡ್ಪ ತಿಂಗ. ಕೊಡಗ್ಲ್ ಎಲ್ಲಾರು ಈ ಕಳಿಕೂಟತ್ ಕೂಡಿಕಳಿಪ ಪುರ್ಡ್ಲ್ ಇಪ್ಪ. ಇದ್ ನೇರಾಯಿತೂ ಪೆರ್ತ್ ನಲ್ಲ ವಿಷಯ, ಮೆಚ್ಚುವನ್ನತದ್.
ಕೊಡಗ್ಲ್ ಕಳಿನಮ್ಮೆ ನಡ್ತುವಕ್ ಮೂಲ ಕಾರಣ ಎಣ್ಣಕ, 1997ಲ್ ಪಾಂಡಂಡ ಕುಟ್ಟಪ್ಪ ಪಿಂಞ ಕಾಶಿ ಅಣ್ಣ ತಮ್ಮಣಂಗ. ಕೊಡವಡ ನಡುಲ್ ಒಕ್ಕಟ್ಟ್ ಒತ್ತೋರ್ಮೆನ ಕೊಂಡಬಪ್ಪದ್ ಇದ್ಂಡ ಬಯ್ಯತುಳ್ಳ ಬಲ್ಯ ಕಾರಣ. ಅಲ್ಲತೆ ಊರೂರ್ಲ್ ಉಳ್ಳ ಸ್ಕೂಲ್ ಕಳಿಪರಂಬುರ ಅಭಿವೃದ್ಧಿಕ್ ಪಿಂಞ ಒಕ್ಕತ್ರೊಳ್ಲ್ ಒಕ್ಕೋರ್ಮೆನ ಬಲಕೂಟೊಕ್ ಅಯಿಂಗ ಅಂದ್ ಮೊಳಿ ಇಟ್ಟ ಕೊಡವ ಕೌಟುಂಬಿಕ ಹಾಕಿ ನಮ್ಮೆ ಅಂದ್ತೊಟ್ಟ್ ಇಂದೆಕಾಕಣೆ ಕೊಡವಡ ನಡುಲ್ ಕೊಡವಾಮೆರ ಪುರ್ಡ್ನ ಬಲಕೂಟಿಯಂಡ್ ಬಂದಿತ್.
ಕೊಡಗ್ಲ್ ಕಳಿನಮ್ಮೆರ ಜನಕ…
ಪಾಂಡಂಡ ಕುಟ್ಟಪ್ಪಂಡಯಿಂಗ ಕೊಡವ ಹಾಕಿ ನಮ್ಮೆಕ್ ಮೊಳಿ ಇಟ್ಟಿತಾನದು ಕೊಡಗ್ಲುಳ್ಳ ಇತರ ಜನಾಂಗಕಾರಳೂ ಕಳಿ ನಮ್ಮೆ ನಡ್ತುವೊಕ್ ಶುರುಮಾಡ್ಚಿ.
ಇನ್ನನೇ ಕಾಲ ಕಯಿಂಜಂಡ್ ಬಂದನ್ನನೆ ಹಾಕಿ ನಮ್ಮೆರನ್ನನೆ ಕೊಡವ ಒಕ್ಕಡೊಕ್ಕಡ ನಡುಲ್ ಕ್ರಿಕೆಟ್ ನಮ್ಮೆಯೂ ಬೊಳಿಕಂಡತ್. ಇದ್ನುಂಡ್ ಮನೋರಂಜನೆ ಎನ್ನೋ ಕ್ಟ್ಟ್ಚಿ, ಆಚೇಂಗಿ ಟೆನ್ನಿಸ್ ಬಾಲ್ಲ್ ಕಳಿಪಾನಾಂಗುಂಡ್ ಕೆಪಿಎಲ್ ಪಿಂಞ ಐಪಿಎಲ್ ಕಳಿಲ್ ಕಳಿಕಾರ ಕೂಡಿ ಕಳಿಪೊದ್ ಅಚ್ಚಕ್ ಸುಲಭ ಅಲ್ಲಾಂದ್ ಎಣ್ಣುವ ಸತ್ಯತ್ನ ಆಯೋಜಕ ಒಕ್ಕ ಪಿಂಞ ಕೊಡವ ಕ್ರಿಕೆಟ್ ಅಕಾಡೆಮಿ ಅರ್ಂಜವದ್ ನಲ್ಲದ್ಂದಾಪ. ಇನ್ನನೇ ಚೆನ್ನ ಕಾಲ ಕಯಿಂಜದು ಕೊಡವ ಒಕ್ಕಡ ನಡುಲ್, ಫುಟ್ಬಾಲ್, ಗಾಲ್ಫ್ ಪಿಂಞ ವಾಲಿಬಾಲ್ ಕಳಿ ನಮ್ಮೆ ಶುರುವಾಚಿ. ಈ ಸಂದರ್ಭತ್ ಲೆದರ್ ಬಾಲ್ ಕ್ರಿಕೆಟ್ ಕಳಿನೋ ನಡ್ತುವೊಕಾಚಿ.
ಇದ್ಲ್ ನಲ್ಲದ್ ಕೆಟ್ಟದ್…
ಮಾರ್ಚ್ ಪಿಂಞ ಏಪ್ರಿಲ್ ತಿಂಗತ್ ಹಾಕಿ ಕಳಿ ನಮ್ಮೆ ಶುರು ಆಪದು ಕ್ರಿಕೆಟ್ ಕಳಿ ನಮ್ಮೆಯೂ ಕೂಡೆ ಶುರು ಆಪ. ಅಲ್ಲತೆ, ಫುಟ್ಬಾಲ್, ಕೇರ್ ಬಲಿಯೂ ಶುರುವಾಪ. ಇದ್ನುಂಡ್ ಕಳಿಕಾರಕ್ ತೊಂದರೆಯಾಪಾಂದ್ ಎಣ್ಣೊದಂತೂ ನೇರ್.
ಸಲಹೆ
ಮಾರ್ಚ್ ಪಿಂಞ ಏಪ್ರಿಲ್ ತಿಂಗತ್ ಹಾಕಿ ನಮ್ಮೆ ತೀಂದೋಪ. ಕ್ರಿಕೆಟ್ ನಮ್ಮೆನ ಇದಾನ ಪಿಂಞ ಶುರುಮಾಡುವೊದ್ ಎಲ್ಲಾರ್ಕೂ ಚೆನ್ನಂಗ್ ಅನುಕೂಲವೇ ಆಪ.
ದಸರಾ ರಜತ್ಲ್ ಎಣ್ಣಕ ಅಕ್ಟೋಬರ್ ತಿಂಗತ್ ಕೇರ್ಬಲಿ, ಫುಟ್ಬಾಲ್ ಪಿಂಞ ವಾಲಿಬಾಲ್ ಕಳಿನಮ್ಮೆನ ನಡ್ತೊಲೂಂದಾಪ. ಮಲ್ಲಮಾಡ ಒಕ್ಕಕಾರ ಕೊಡವ ಒಕ್ಕಡ ನಡುಲ್ ವಾಲಿಬಾಲ್ ಕಳಿನ ಅಕ್ಟೋಬರ್ ತಿಂಗತ್ ಯಶಸ್ವಿಯಾಯಿತ್ ನಡ್ತ್ಚಿ.
ಇದ್ನುಂಡ್ ಕಳಿಕಾರಕ್ ಅನುಕೂಲ ಆಚಿ. ಇದ್ ಎನ್ನಂಗ್ಂದ್ ಎಣ್ಣ್ನಕ ಓರ್ ಒಕ್ಕತ್ ಹಾಕಿ ಕಳಿಪ ಕಳಿಕಾರಳೇ ಬೋರೆ ಕಳಿಲೂ ಕೂಡಿಕಳಿಪ.
ಕಳಿಕಾರಡ ಕೈಕಾಲ್ಕ್ ಎನ್ನೇಂಗಿ ಊನ ಆನಕ, ನೊಂಬಲ ಆನಕ ದಾರ್ ಜವಾಬ್ದಾರಂಗ ಎಣ್ಣುವದ್ ಇಲ್ಲಿ ಪ್ರಶ್ನೆ. ಇದ್ ಅಯಿಂಗಡ ಕಳಿರ ಬದ್ಕ್ರ ದಿಕ್ಕ್ನೇ ಬದಲಾಯಿಚಿಟ್ಟ್ರುವಾಂದ್ ಎಣ್ಣುವಾನ ಆಯೋಜಕ ಒಕ್ಕಕಾರ ಅರ್ಂಜವಂಡು.
ಕಳಿಕಾರಕ್ ಅಯಿಂಗಡ ಚಾಕ್ರಿನುಂಡಾಯಿತ್ ರಜೆ ಕ್ಟ್ಟತ ತೊಂದರೆಯೂ ಆಪ. ವಿಪರೀತ ಖರ್ಚಿನ ಗೇನ ಮಾಡೊಕ ಒಕ್ಕಕಾರಡ ಕಷ್ಟತ್ನೋ ನಂಗ ಅರ್ಂಜವೊಂಡೂಂದಾಪ.
ಮೂಲ ಹಾಕಿ ಕಳಿಕ್ ತೊಂದರೆ ಆಕು…
ಇದನೆಲ್ಲಾ ಬೇರ್ಚಿಟ್ಟಿತ್ ನೋಟುವಕಾಪಕ ಭಾರತತ್ರ ರಾಷ್ಟ್ರ ಕಳಿ ಮೂಂದ್ ಕುರಿ ಲಿಮ್ಕಾ ದಾಖಲೆ, ಓರ್ ಕುರಿ ಗಿನ್ನಿಸ್ ವಿಶ್ವ ದಾಖಲೆ ಪಿಂಞ ಎಟ್ಟ್ ಕುರಿ ಒಲಿಂಪಿಕ್ಸ್ಲ್ ಪೊನ್ನ್ ಗೆದ್ದ ಮೂಲ ಕಳಿ ಹಾಕಿನ ನಂಗ ಬಯ್ಯಕ್ ಇಟ್ಟನ್ನನೆ ಆಪ.
2024ಲ್ ಗಿನ್ನಿಸ್ ದಾಖಲೆ …
2024ಲ್ ಕುಂಡ್ಯೋಳಂಡ ಹಾಕಿ ನಮ್ಮೆ ವಿಶ್ವದಾಖಲೆ ಸೃಷ್ಟಿ ಮಾಡ್ಚಿ. ಇದ್ ವಿಶ್ವತ್ರ ಭೂಪಟತ್ ಹಾಕಿ ಕಳಿನ ಎತ್ತರಕ್ ಎಡ್ತ್ ಕಾಟ್ಚಿ. ಇದ್ನುಂಡೇ ಇಂದ್ 396 ಒಕ್ಕ ಕೂಡಿಯಾಡಿತ್ ಅಂತರಾಷ್ಟ್ರೀಯ ಮಟ್ಟತ್ರ ತೀರ್ಪುಗಾರಿಕೆ, ವೀಕ್ಷಕ ವಿವರಣೆ ಪಿಂಞ ಪ್ರಪಂಚಕೆಲ್ಲಾ ಕೊಡಗ್ರ ಹಾಕಿ ಕಳಿರ ಕೇಳಿ ಎತ್ತುವಕ್ ಸಾಧ್ಯ ಆಯಿತ್ ಎಣ್ಣುವಾಲ್ ದಂಡ್ ತಕ್ಕಿಲ್ಲೆ.
120ಕಿ.ಮೀ ರಭಸತ್ ವಾಹನತ್ರ ಓಟ್ಂಗಳಿ
ಹುದಿಕೇರಿಲ್ ಕ್ರಿಕೆಟ್ ನಮ್ಮೆ ತೀತಿತ್ 120ಕಿ.ಮೀ ರಭಸತ್ ತಂಗಡ ವಾಹನತ್ನ ಓಡ್ಚಿಟ್ಟಂಡ್ ಮಡಿಕೇರಿಲ್ ಹಾಕಿ ಕಳಿಕ್ ಬಂದಿತ್ ಎತ್ತುವೊ, ಕಳಿ ಕಳ್ಚಿತ್ ಜೋಡುಪಟ್ಟಿರ ನೆಲ್ಚಿ ಬೊಳಿಲ್ ನಡ್ಪ ಫುಟ್ಬಾಲ್ ಕಳಿಕ್ ಎತ್ತಿಯವೊ ಪುನಃ ಅದೇ ರಭಸತ್ ಕಳಿಕಾರ ಬಂದಿತ್ ಕೂಡುವೊ, ಇದೆಲ್ಲಾಂಡ ಜವಾಬ್ದಾರಿ ವಹಿಸುವವು ದಾರ್? ಇನ್ನತ ಆತುರ, ರಭಸ ಅಪ್ಪ ಅವ್ವಂಗಕ್ ಗೊತ್ತಿಂಜಿತೋ ಗೊತ್ತಿಲ್ಲತೆಯೋ ಒಳಿಮರೆಲ್ ನಡ್ಂದಂಡುಳ್ಳದ್ ನೇರ್. ಇನ್ನನೆ ಮಕ್ಕಡ ಜೀಂವಕ್ ಬೆಲೆ ಕೊಡ್ಕತೆ ಕಳಿಪೊದ್ ಸರಿ ಕಾಂಬ್ಲೆ. ಇಲ್ಲಿ ಕಳಿ ನಡ್ತುವ ಒಕ್ಕಕಾರ ಕೈಕೆಟ್ಟಿತ್ ಅಳ್ತಂಡುಳ್ಳನ್ನನೆ ಕಾಂಬ. ನಂಗಕ್ ನಂಗಡ ಪ್ರತಿಯೋರ್ ಮಕ್ಕಡ ಜೀವ ಮುಖ್ಯಪಟ್ಟದಲ್ಲಾ? ಆನಾಂಗುಂಡು ಎಲ್ಲಾ ಕಳಿನಮ್ಮೆನ ಓರೇ ಸಮಯತ್ ನಡ್ತುವೊದ್ ನಂಗಕ್ ಎನ್ನಂಗೋ ಅಚ್ಚಕ್ ಸರಿ ಕಾಂಬ್ಲೆ.
ಪ್ರೇಕ್ಷಕಂಗಡ ಕೊರತೆ…
ಇಕ್ಕಿಕ್ಕ ಕೊಡವ ಹಾಕಿ ನಮ್ಮೆಲ್ ಕ್ರೀಡಾಭಿಮಾನಿಯಡ ಸಂಖ್ಯೆ ಭಾರೀ ಕಮ್ಮಿ ಆಯಂಡುಂಡ್ಂದಾಪ. ಏದ್ ಕಳಿಕ್ ಕೊರು ಇಲ್ಲತನ್ನನೆ ಕಳಿ ನಮ್ಮೆರ ಸಮಯತ್ನ ನಿರ್ಕ್ ಮಾಡಿತ್ ಕ್ರೀಡೆನ ಉಳ್ತಿ ಬೊಳ್ತ್ನಕ ಎಲ್ಲಾರ್ಕೂ ನಲ್ಲದಾಪ. ಇನ್ನನೇ ಮಿಂಞಕ್ ಪೋಯಂಡುಂಡೇಂಗ್ ಎಲ್ಲಾ ಕಳಿ ನಮ್ಮೆನ ಒಕ್ಕಚೇ ನಡ್ತಿಯಂಡ್ ಪೋಚೆಂಗಿ ಇದ್ನುಂಡೇ ನಂಗಡ ನಡುಲ್ ಅಪ್ಪರಿಪ್ಪರ ಜಗಳ ಬಕಣಕೂ ಬಟ್ಟೆಯಾಯಿಪೋಕೂಂದ್ ಚೆನ್ನ ಪೋಡಿಯೂ ಆಪ.
18 ಒಲಂಪಿಯನ್ಸ್ …
18 ಒಲಂಪಿಯನ್ ಕಳಿಕಾರಳ ದೇಶಕ್ ಕೊಡ್ತ ಚೆರಿಯದಾನ ಕೊಡಗ್ ಜಿಲ್ಲೆಲ್ ಎಲ್ಲಾ ಕಳಿಕೂ ಸಮಾನ ಅವಕಾಶ ಉಂಡ್. ಆಚೆಂಗಿ ಏದೋರ್ ತಡೆ ಇಲ್ಲತೆ ಎಲ್ಲಾ ಕಳಿ ನಮ್ಮೆ ನಡ್ಕೊಂಡು ಎಣ್ಣುವದ್ ಇಲ್ಲಿ ವಿಶೇಷ ಕಾಳಜಿ.
ಇಲ್ಲಿ ತೀರ್ಮಾನ ಎಡ್ತವಂಡಿಯೆ ದಾರ್?
ಅಖಿಲ ಕೊಡವ ಸಮಾಜ, ಫೆಡರೇಶನ್ ಆಫ್ ಕೊಡವ ಸಮಾಜ, ಕೊಡವ ಹಾಕಿ ಅಕಾಡೆಮಿ, ಕೊಡವ ಕ್ರಿಕೆಟ್ ಅಕಾಡೆಮಿ, ಕೇರ್ ಬಲಿ ಅಕಾಡೆಮಿ, ಫುಟ್ಬಾಲ್ ಅಕಾಡೆಮಿ ಪಿಂಞ ವಾಲಿಬಾಲ್ ಅಕಾಡೆಮಿ ಎಲ್ಲಾ ಒಂದಾಯಿ ಕೂಡಿತ್ ಅಳ್ತಿತ್ ಅಪ್ಪರಿಪ್ಪರ ತಕ್ಕ್ ಪರ್ಂದಿತ್ ಓರ್ ತೀರ್ಮಾನಕ್ ಬಕ್ಕೊಂಡು. ಅಂದಕ ಮಾತ್ರ ಒಕ್ಕಡೊಕ್ಕಡ ನಡುರ ಕಳಿ ನಮ್ಮೆಕ್ ಓರ್ ಉಳಿಗಾಲ.
ಇದ್ನೆಲ್ಲಾ ಬೇರ್ಚಿಟ್ಟಿತ್, ಮೋಪ್ಕೂಟ ಮಾಡಿತ್ ಒಮ್ಮನತ್ರ ತೀರ್ಮಾನಕ್ ಎಲ್ಲಾರೂ ಕೂಡಿತ್ ಬರೊಂಡೂಂದ್ ಸುಮಾರ್ ಪೆರಿಯ ಕಳಿಕಾರಕ್ ತೋಂದುವಾಂದ್ ಅಯಿಂಗಡೆಲ್ಲಾಡ ಸಲಹೆ. ಎಲ್ಲಾಂಗೂಡಿ ಕೊಡವಾಮೆ ಉಳಿಯೊಂಡು ಕಳಿ ನಮ್ಮೆ ಬೊಳಿಯೊಂಡು ಎಣ್ಣುವದ್ ಇದ್ಂಡ ಬಯ್ಯತ್ರ ಬಲ್ಯ ಉದ್ದೇಶ. ಇಕ್ಕಾಯಿತ್ ಕುಟ್ಟತ್ಂಜ ಮಡಿಕೇರಿಕೆತ್ತಣೆ ಕೊಡವಡ ಕಾನಡ್ಪು ಜಾಥ ಯಶಸ್ವಿಯಾಚಲಾ, ಎನ್ನನೆ? ಇದನರ್ಂಜಿತ್ ಧಾಳಾಧೂಳಿ ಖರ್ಚಿ ಆಕತನ್ನನೆ ಆಪಚ್ಚಕ್ ಬೆರಿಯ ಓರ್ ತೀರ್ಮಾನಕ್ ನಂಗ ಬರೊಂಡು. ನಂಗಡ ಒಕ್ಕಟ್ಟ್ ಒತ್ತೋರ್ಮೆನ ನಂಗ ಇನ್ನತ ನಲ್ಲ ವಿಷಯಕ್ ಬಳಸಂಡಿಯದ್ ನೇರಾಯಿತೂ ಇಂದ್ ಅವಶ್ಯ.
ಕೊಡವಾಮೆ ಬಾಳೊ…