ಬೆಂಗಳೂರ್:ಜು.22:(nadubadenews): ಬೆಂಗಳೂರ್ ಕೊಡವ ಸಮಾಜ ಮಿಂಞತ ಆಡಳಿತ ಮಂಡಳಿರ ಪೈಪೋಟಿ ಬಪ್ಪ ಸೆಪ್ಟಂಬರ್ಲ್ ನಡ್ಪದುಂಡ್. ಈಂಗಾಯಿತ್ ಇಕ್ಕಾಕಲೆ ಪೈಪೋಟಿಕ್ ಇಳ್ಂಜಿತುಳ್ಳ ಬಾಳೆಯಡ ಕರುಣ್ ಕಾಳಪ್ಪ, ಅಲ್ಲಪ್ಪಿರ ಪೂವಪ್ಪ ಕೂಟ್ಕಾರ, ಕೊಡವಡ ಕುಲಮಾತೆ, ಆದಿಕಾವೇರಮ್ಮೆರ, ತಲೆ ಕಾವೇರಿ ಕುಂಡಿಕೆರ ಮಿಂಞಲ್ ಕೈಒಡ್ಡಿತ್ ಬೊಡ್ಯಂಡ್, ನಾಡ್ಕೂ, ದೇಶಕೂ, ಕೊಡವಾಮೆಕೂ ನೇರ್ ನಲ್ಲದಾಡ್, ನಲ್ಲಾಮೆ, ನಲ್ಲರಿವು, ನಲ್ಲರಿಕೆಕ್ ಗೆಲು ಆಯಿತ್, ಕೇಳಿಂಗೀರ್ತಿ ಪೊಲಂದ್ ಬರಡ್ಂದ್ ಬೋಡ್ಯಂಡ್ ಬಂದಿತ್, ಬಾಳೆಯಡ ಕರುಣ್ ಕಾಳಪ್ಪ ಕೂಟ್ಕಾರಕ್ ಓಟ್ ಇಡೋಂಡೂಂದ್ ಮಾಜನಳ ಕೈ ತೊತ್ತ್ ಕೇಟಂಡಿತ್.
ಕೊಡವನಾನವು ಬಾಳ್ ಬದ್ಕ್ಕಾಯಿತ್ ಉಲಗತ ಏದೇ ಮೂಲೆ ಮೋಳ್ಲ್ ಬಾಳ್ ನೆಲೆ ಕಂಡಿತುಂಡೇಂಗೂ, ನಂಗಡ ನಲ್ಲಾಂಗೂ ತೀಯಂಗೂ, ಕುಶೀಲ್ ಕೊರುಲು ಆದ್ಯ ಊಜಳೆ ಎದ್ದ್ ಬಪ್ಪದೆ ಅವ್ವಕಾವೇರಿ, ಮಾಗುರುವೇ ಕಾತ್ ರಕ್ಷೆ ಮಾಡೀಂದ್.
ಅದೇ ಪೋಲೆ ಎಲ್ಲಾ ಆಯಿಮೆ ಕೊಯಿಮೆಕೂ, ಮೊಳಿಎಡ್ತ್ ಮೊಟ್ಟ್ ಇಡೋ ಮುಪ್ಪಡೆ ಅವ್ವ ಕಾವೇರಿರ ತೇರ್ಥ ಕೈಗೊಂಡ್ ಕುಂಡಿಕೆ ಮಿಂಞಲ್ ಬೋಡೋದ್ ಕೊಡವಾಮೆರ ಆದ್ಯ ನಡೆ. ಅದೇ ಪೋಲೆ, ಉಲಗಕೇಳಿರ ಪಿಂಞ ಕೊಡವಡ ಬಲ್ಯಣ್ಣಂಡ ಜಾಗತುಳ್ಳ ಬೆಂಗಳೂರ್ ಕೊಡವ ಸಮಾಜನ ಇಂಞಚ್ಚಕೂ ಒರ್ಪುಚಿಡೋಕ್ ಬಯಂದ್ ಪೈಪೋಟಿ ಕಳತುಳ್ಳ, ಕೊರವುಕಾರನಾಪಕ್ (ಅಧ್ಯಕ್ಷ ಸ್ಥಾನಕ್) ಬಾಳೆಯಡ ಕರುಣ್ ಕಾಳಪ್ಪ, ಕೂಟ್ಕೊರವುಕಾರಿಯಾಪಕ್(ಉಪಾಧ್ಯಕ್ಷೆ ಸ್ಥಾನಕ್) ಪೆಮ್ಮಂಡ ವೀಣಾ ದೇವಯ್ಯ(ಸಾವಿತ್ರಿ), ಖನಪಟ್ಟ ಕಾರ್ಯಕಾರನಾಪಕ್(ಗೌರವ ಕಾರ್ಯದರ್ಶಿ ಸ್ಥಾನಕ್) ಅಲ್ಲಪ್ಪಿರ ಪೂವಪ್ಪ, ಕೂಡ್ಕಾರ್ಯಕಾರನಾಪಕ್(ಜಂಠಿ ಕಾರ್ಯದರ್ಶಿ ಸ್ಥಾನಕ್) ಮಾಳೇಟಿರ ರಾಜ ತಿಮ್ಮಯ್ಯ, ಲೆಕ್ಕಪಟ್ಟಿಕಾರನಾಪಕ್(ಖಜಾಂಚಿ ಸ್ಥಾನಕ್) ಕಾಡ್ಯಮಾಡ ಎಸ್. ಸಂಜಯ್, ಕೂಡ್ಲೆಕ್ಕಪಟ್ಟಿಕಾರ ಆಪಕ್(ಜಂಠಿ ಖಜಾಂಚಿ ಸ್ಥಾನಕ್) ಉಡುವೆರ ಸಿ. ಸುರೇಶ್ ಪೊನ್ನಪ್ಪ ಅಯಿಂಗೆಲ್ಲರೂ ಒತ್ತೋರ್ಮೆಕೊಂಡಿತ್, ಬಾಳೆಯಡ ಕರುಣ್ ಕಾಳಪ್ಪ ಪಿಂಞ ಅಲ್ಲಪ್ಪಿರ ಪೂವಪ್ಪ ಅವು ಪಂಡ್ ಪೋಲೆತ ನಡೆಕೊತ್ತ್ ಖುದ್ದ್ ಇಗ್ಗುತಪ್ಪ ಕಾವೆರಮ್ಮೆರ ಮಡ್ಲ್ ಕೈ ತೊತ್ತಂಡ್, ಮಾಜನಳ ಓಟ್ ಕೇಪಕ್ ಇಳ್ಂಜದ್ ಕೊಡವಾಮೆರ ಭೀರ್ಯಕೊತ್ತ ನಡೆಂದ್ ಜನಮೆಚ್ಚಿತ್ ಕೊದಿ ಪಡುವನ್ನತದ್.