ಕದನೂರ್, ಮಾ.01: (ಕಾಣತಂಡ ವಿವೇಕ್ ಅಯ್ಯಪ್ಪ) ಪೊಮ್ಮಾಲೆ ಕೊಡಗ್’ಲ್ ಚಪ್ಪಲೆ ಪುಟ್ಟ್ ನಮ್ಮೇಂದ್ ಕೇಳಿ ಪೋನ ಕದನೂರ್ ಶ್ರೀ ಭಗವತಿ ದೇವಿರ ನಮ್ಮೆಕ್ ಚಪ್ಪೆಲೆ ಪುಟ್ಟ್ ನಮ್ಮೆ ನಾಳೆಂಜ ಮಾರ್ಚ್ 07ನೇ ಬೊಳ್ಯಾಚೆಕೆತ್ತನೆ ನಡ್ಪ.
ಆ ಪೋಲೆ, ಇದೇ ಫೆಬ್ರವರಿ 18ನೇ ಕುಂಬ್ಯಾರ್ ಆದ್ಯತ ಚೊವ್ವಾಚೆ ಒಯಿಪತ್ 4-30 ಗಂಟೆಕ್ ನಮ್ಮೆ ಕೆಟ್ಟ್ ಇಟ್ಟಿತ್ . ಕುಂಬ್ಯಾರ್ ದಂಡನೆ ಚೊವ್ವಾಚೆ ಫೆಬ್ರವರಿ 25ನೇ ಒಯಿಪತ್ 5-30 ಗಂಟೆಕ್ ನಮ್ಮೇಲ್ ತೆರೆ ಕೆಟ್ಟುವ ಮಲಿಯಂಗ್ ನೂಲ್ ಇಟ್ಟಿತ್.
ಮಾರ್ಚ್ 02ನೇ ನಾರಾಚೆ ಬೈಟ್ 8 ಗಂಟೆಕ್ ಅಂದಿ ಬೊಳಕ್, ದೇವ ಪೊರ್ಮೆ ಬಪ್ಪ. ಮಾರ್ಚ್ 03ನೇ ತಿಂಗಳಾಚೆ ನೆರಪು, ಒಯಿಪತ್ 5-30 ಗಂಟೆಕ್ ದೇವ ಪೊರ್ಮೆ ಬಪ್ಪಂಜಿ, ಅಯ್ಯಪ್ಪಂಡ ಬನಕ್ ಪೋಯಿತ್ ಬಂತ್, ದೇವಸ್ಥಾನತ್ 9ಸುತ್ತ್ ತಡ್ಂಬು ಆಟ್, ಬಂಡಾರ, ಊಟೋಪಚಾರ ನಡ್ಪ. ಬೈಟ್ 10-30ಗಂಟೆಕ್ ಕಾಡ್ಲ್ ಅಯ್ಯಪ್ಪಂಡ ಮುಂಬಾರ್ ತೆರೆಲ್, ಚಪ್ಪೆಲೆ ಪುಟ್ಟ್ ಪ್ರಸಾದ ಇಪ್ಪ.
ಮಾರ್ಚ್ 04ನೇ, ಕುಂಬ್ಯಾರ್ ಮೂಂದನೆ ಚೊವ್ವಾಚೆ ಬಲ್ಯನಮ್ಮೆ. ಅಂದ್ ಮಜ್ಜಣ 12 ಗಂಟೆಕ್ ಮಾಪೂಜೆ, ಒಯಿಪತ್ 4.30ಗಂಟೆಕ್ ದೇವಸ್ಥಾನತ್ ತೆಂಗೆ ಬೊಡಿ, ಎತ್ತ್ಪೋರ್, ಬಾಳೋಪಾಟ್ ಇಪ್ಪ. ದೇವಡ ರೂಪು ಓರಣ ಮೊಟ್ಟೆಕ್ ಪೋಯಿತ್ ಬಂದದು, ದೇವಕೆರೆಲ್ ಕುಳ್’ಚಿತ್ ಬೈಟ್ 7-30 ಗಂಟೆಕ್ ದೇವಸ್ಥಾನತ್ 11ಸುತ್ತುರ ದೇವಡ ತಡ್ಂಬು ಆಟ್, ಬಂಡಾರ ಬೇಂಗೋ, ಊಟೋಪಚಾರ ನಡ್ಪ. ಪಿತ್ಯಾಂದ್ ಮಾರ್ಚ್ 05ನೇ ಪದ್ನಾಚೆ ಪೊಲಾಕ 4.30 ಗಂಟೆಕ್ ಶ್ರೀ ಭಗವತಿ ದೇವಿರ 18 ಮೊಳ ಉದ್ದ ಉದ್ದಮುಡಿ ತೆರೆ ಕೆಟ್ಟುವೊ, ನಾಳಾಂಕೆ ಮಾರ್ಚ್ 07ನೇ ಬೊಳ್ಯಾಚೆ ಮಜ್ಜಣ 12 ಗಂಟೆಕ್ ದೇವಸ್ಥಾನತ್ ಮಾಪೂಜೆರ ಕೂಡೆ ಈ ಕಾಲತ ನಮ್ಮೆ ತೀರುವ.