ವಿರಾಜಪೇಟೆ, ಮಾ.06: ಕರ್ನಾಟಕ ಕೊಡವ ಸಾಹಿತ್ಯ ಅಕಾಡೆಮಿ ಪಿಞ್ಞ ಅಮ್ಮತ್ತಿ ಕೊಡವ ಸಮಾಜತ್ರ ಒತ್ತೊರ್ಮೆಲ್, 2025 ಮಾರ್ಚ್ 29 ಪಿಞ್ಞ 30ನೆ ಚೆನಿಯಾಚೆ ಪಿಂಞ ನಾರಾಚೆ, ಅಮ್ಮತ್ತಿ ಕೊಡವ ಸಮಾಜತ್ ಕೊಡವ ಬಲ್ಯನಮ್ಮೆ ಕಾರ್ಬಾರ್ ನಡ್ತುವಕ್ ಕೈ ತೆಕ್ಕಿತ್ಂದ್ ಅಕಾಡೆಮಿ ಕೊರವುಕಾರ ಅಜ್ಜಿನಿಕಂಡ ಮಹೇಶ್ ನಾಚಯ್ಯ ಅವು ಅರಿಚಿಟ್ಟಿತ್.
ಈ ಆಯಿಮೆಲ್ ಪುಸ್ತಕ ಬುಡುಗಡೆ, ತರಾವರಿ ಆಟ್-ಪಾಟ್ ಪೈಪೋಟಿ, ವಿಚಾರ ಒಪ್ಪುಚಿಡೋ, ಕವಿವೊರ್ಮೆ, ಕಾನಡೆಪೋಕ್, ಕೊಡವ ಪಳೆಯ ವಸ್ತು ತೊರಂದ್ ಕಾಟೋ, ಪುಸ್ತಕ ಮಾರುವೋ, ಅಲ್ಲತೆ ತರಾವರಿ ಆಯಿಮೆ ಕೊಯಿಮೆ ನಡ್ಪ. ಪೈಪೋಟಿಲ್ ಗೆದ್ದೈಂಗಕ್ 1ನೆ, 2ನೆ, 3ನೆ ಇನಾಂ ಇಲ್ಲೇಂಗಿ 1ನೆ ಪಿಞ್ಞ 2ನೆ ಇನಾಂ ಇಪ್ಪ.
ಆಯಿಮೆಲ್ ಈ ಕ್ದಿಯತನ್ನಕೆ ಪೈಪೋಟಿ ನಡ್ಪ.
1. ಉಮ್ಮತಾಟ್:- ಪೊಮ್ಮಕ್ಕಡ ಆಟ್ (12+2=14) : 8 ನಿಮಿಷತ್ರ ನೇರತ್ 2 ಜನ ಪಾಡಿತ್ 12 ಜನ ಆಡೊಂಡು. ಗೆದ್ದಯಂಗಕ್ ಉ.15000, 10000, 8000 ಇಪ್ಪ.
2. ಬೊಳಕಾಟ್:- ಆಮಕ್ಕಡ ಆಟ್ (12+4=16) : 8 ನಿಮಿಷತ್ರ ನೇರತ್ 4 ಜನ ಪಾಟ್ಕಾರಕ್ 12 ಜನ ಆಟ್ಕಾರ ದುಡಿಕೊಟ್ಟ್ ಪಾಟ್ಕ್ ಮಾತ್ರ ಆಡೊಂಡು. ಗೆದ್ದಯಂಗಕ್ ಉ.15000, 10000, 8000 ಇಪ್ಪ.
3.ಕೋಲಾಟ್:- ಆಮಕ್ಕಡ ಆಟ್ (12) 8 ನಿಮಿಷತ್ರ ನೇರ ವಾಲಗಕ್ ಪಿಂಞ ದುಡಿ ಕೊಟ್ಟ್ ಪಾಟ್ಕೂ ಆಡೋಲು. ಗೆದ್ದಯಂಗಕ್ ಉ.15000, 10000, 8000 ಇಪ್ಪ.
4 ಉರ್’ಟಿ ಕೊಟ್ಟ್ ಆಟ್:- (12+2=14) ಪರಿಶಿಷ್ಟ ಪೊಮ್ಮಕ್ಕಕ್ ಕೂಡಿತುಳ್ಳ ಆಟ್. 8 ನಿಮಿಷ ನೇರತ್ 12 ಜನ ಪೊಮ್ಮಕ್ಕ ಆಡೊಂಡು. 2 ಆಳ್ ಪಾಡೊ, ಒಟ್ಟು 14 ಜನ. ಗೆದ್ದಯಂಗಕ್ ಉ. 15000, 10000, 8000 ಇಪ್ಪ.
5.ಬಾಳೊಪಾಟ್:- ಆಮಕ್ಕಡ ಪಾಟ್. 8 ನಿಮಿಷ ನೇರತ್ ನಾಲಾಳ್ ಪಾಡೊಂಡು. ದೇಶಕೆಟ್ಟ್, ಕಾವೇರಮ್ಮೆರ ಪಾಟ್ನ ದಾರೆಲ್ಲ ಕಲಿಕೂಟಿಯಂಡ್ ನಲ್ಲೋಣೆ ಅರ್ಥವತ್ತಾಯಿತ್ ಪಾಡುವ ಅನ್ನತಯಿಂಗಳ ಆಯ್ಕೆ ಮಾಡುವ. ಬೊರೀ ಬಾಯಿಪಾಠ ಮಾಡಿಯಂಡ್ ಪಾಡ್ನಕೆ ಆಪುಲೆ. ಗೆದ್ದಯಂಗಕ್ ಉ.4000, 3000 ಇಪ್ಪ.
6.ಪರಿಯಕಳಿ:- ಆಮಕ್ಕಡ ಆಟ್. 4 ನಿಮಿಷ ನೇರತ್ರ ಈ ಚಡ್ತತ್ ದಂಡಾಳ್ ಇರೊಂಡು. ಗೆದ್ದಯಂಗಕ್ ಉ. 1500, 1000 ಇಪ್ಪ.
7.ಸಮ್ಮಂಧ ಅಡ್ಕುವ:- 5 ನಿಮಿಷ ನೇರತ್ ಆಮಕ್ಕಕ್ ಮಾತ್ರ ಪಳೀಯ ಕೊಡವ ತಕ್ಕ್’ಕ್ ಒತ್ತ್ ಕೊಡ್ತಂಡ್ ಪೆರೆಯೊಂಡು. ಗೆದ್ದಯಂಗಕ್ ಉ. 3000, 2000 ಇಪ್ಪ.
8.ಕಪ್ಪೆಯಾಟ್:- 7-14 ಬಯತ್ರ ಆಮಕ್ಕಕ್. ಕೈನ ನೆಲಕ್ ಕುತ್ತಿಯಂಡ್ ಪಾರುವನ್ನೆಕೆ ಇಲ್ಲೆ. ಗೆದ್ದಯಂಗಕ್ ಉ. 1500, 1000, 500 ಇಪ್ಪ.
9 ವಾಲಗ-ಕೊಂಬ್-ಕೊಟ್ಟ್:- 15ನಿಮಿಷ ನೇರತ್. ಪಂಡೇತ 12ತರ ಆಟ್ ಆಡುವನ್ನಕೆ ವಾಲಗ, ಕೊಂಬು-ಕೊಟ್ಟೋಡೆ ಆಡೋಂಡು. ಗೆದ್ದಯಂಗಕ್ ಉ. 8000, 6000, 5000. ಇನಾಂ ಇಪ್ಪ.
10.ವಾಲಗತ್ತಾಟ್:- 5 ನಿಮಿಷತ್ರ ಆಟ್. 60 ಬಯತ್ ಮೀರ್ನ ಆಣಾಳ, ಪೊಣ್ಣಾಳುವಕ್, 18-60 ಬಯತ್ರ ಒಳ್ಲುಳ್ಳ ಆಣಾಳ, ಪೊಣ್ಣಾಳುವಕ್, 07-18 ಬಯತ್ರ ಒಳ್ಲುಳ್ಳ ಕ್ಣ್ಣಮಕ್ಕ, ಮೂಡಿಮಕ್ಕಕ್. ಕೊಟ್ಟ್’ಕೊತ್ತ ಆಟ್ ಮುಖ್ಯವಾಯಿತಿಪ್ಪ. ಗೆದ್ದಯಂಗಕ್ ಉ. 1000, 700
11.ಪಾನಿಕೆಟ್ಟ್, ಕೋರೆಕಟ್ಟ್, ವಸ್ತ್ರಕೆಟ್ಟ್:- ಒಮ್ಮ ಮಂಡೆಕ್ ವಸ್ತ್ರ ಬೆಚ್ಚ ಪಿಞ್ಞ ಎಡ್ಪನ್ನಕೆ ಇಲ್ಲೆ, ಉತ್ತಿತ್ ಕೆಟ್ಟುವನ್ನಕೆ ಇಲ್ಲೆ.
ಪೈಪೋಟಿಲ್ ಕೂಡಿಯಾಡುವಯಿಂಗಕ್ ಅರಿವಿಕೆ,,
1. ಈ ಕೊಡವ ಸಾಂಸ್ಕೃತಿಕ ಬಲ್ಯನಮ್ಮೆರ ಚಡ್ತತ್ ಕೂಡಿಯಾಡುವವು ಕೊಡವ ಮೂಲ ಸಂಪ್ರದಾಯಕೊತ್ತ ಜನಾಂಗಕ್ ಕೂಡಿತುಳ್ಳವು ಆಯಿತಿರೊಂಡು. ಚಡ್ತತ್ ಕೂಡಿಯಾಡುವವು 29-03-2025 ಪೊಲಾಕ 9.00 ಗಂಟೆಕ್ ಪರಂಬುಲ್ ಇರೋಂಡು.
2. ಚಡ್ತತ್ ಒರೇ ನೇರತ್ ಅಮ್ಮತ್ತಿ ಕೊಡವ ಸಮಾಜತ್ರ ಬೋರೆ ಬೋರೆ ಜಾಗತ್ ನಡ್ಪ. ಚಡ್ತತ್ ಕೂಡಿಯಾಡ್ವವು ತಯಾರಿ ಇರೊಂಡು.
3. ಆಟ್-ಪಾಟ್ರ ಚಡ್ತತ್ ಕೂಡಿಯಾಡುವ ಎಲ್ಲಾರೂ ಅವಶ್ಯವುಳ್ಳ ಪರಿಕರ, ಪಾಟ್, ಉಡುಪು, ನಿಂಗಳೇ ಕೊಂಡ ಬರೊಂಡು.
4. ತೀರ್ಪುಗಾರಂಡ ತೀರ್ಮಾನ ಆಖೀರಿಯಾನದ್, ಇದ್ನ ಚೋದ್ಯ ಮಾಡುವ ಅಧಿಕಾರ ಇಪ್ಪುಲೆ, ಇದ್ಂಗ್ ಎಲ್ಲಾಡ ಸಾಕಾರ ಬೋಂಡು.
5. ಎಲ್ಲಾ ಪೈಪೋಟಿಲ್ ಗೊತ್ತ್ ಮಾಡ್ನ ಪೋಲೆ 1, 2, 3 ಇಲ್ಲೇಂಗಿ 1, 2ನೆ ಇನಾಂ ಇಪ್ಪ.
6. ಏದೇ ಚಡ್ತಕ್ 5 ಟೀಂ ಕ್ಂಜ ಕಮ್ಮಿ ಇಂಜಕ 1ನೇ ಇನಾಂ ಮಾತ್ರ ಇಪ್ಪ.
ಬಲ್ಯನಮ್ಮೆರ ದಂಡ್ ದಿನ ಮಜ್ಜಣ ಊಟೋಪಚಾರ ಇಪ್ಪ
ಕೊಡವ ಪಳೆಯ ವಸ್ತು ಪ್ರದರ್ಶನ : ವಸ್ತು ಪ್ರದರ್ಶನಕ್ ಪಳೆಯ ಎಲ್ಲಾ ವಸ್ತು, ಸಲಕರಣೆ, ಮಾಲ್ಮಟ, ಕಚ್ಚಿಮುಟ್ಟ್ ಕೂಡ್ನನಕೆ ಎಲ್ಲಾ ವಸ್ತುನ ಪ್ರದರ್ಶನಕ್ ಬೆಕ್ಕೂಲು, ಈ ಪ್ರದರ್ಶನಕ್ ಮೂಂದ್ ನಲ್ಲ ಇನಾಂ ಉಂಡ್.
ಪುಸ್ತಕ ಪ್ರದರ್ಶನ:- ಕೊಡವ ತಕ್ಕ್’ರ ಪಿಞ್ಞ ಕೊಡವ್ಕ್ ಸಮ್ಮಂಧಪಟ್ಟ ಎಲ್ಲಾ ಪುಸ್ತಕತ್ರ ಮಾರಾಟ ಪ್ರದರ್ಶನಕ್ ಅವಕಾಶ ಉಂಡ್. ಅಕಾಡೆಮಿಲ್ ಪ್ರಕಟ ಆನ ಎಲ್ಲಾ ಪುಸ್ತಕತ್ರ ರಿಯಾಯಿತಿ ಮಾರಾಟ ಇಪ್ಪ.
ಸಾಂಸ್ಕೃತಿಕ ಕಾಲ್ನಡ್ಪು:- 30-03-2025 ಪೊಲಾಕ 9.00 ಗಂಟೆಕ್ ಅಮ್ಮತ್ತಿ ಟೌನ್ಂಜ ಪೊರ್ಟಿತ್ ಸಮಾಜಕ್ ಎತ್ತಣೆಕ್ ಸಾಂಸ್ಕೃತಿಕ ಮೆರವಣಿಗೆ ಇಪ್ಪ.
ಕೇಳಿಪಟ್ಟ ಪಾಟ್ಕಾರಳುಂಡ್ ಎಡೆಕೆಡೆಕ್ ಕೊಡವ ಪಾಟ್ ಇಪ್ಪ. ಅನ್ನನೇ ಪಾಡುವಕ್ ಇರಾದೆ ಉಳ್ಳಯಿಂಗಕೂ ನೋಟಿ ನೋಟಿತ್ ಅವಕಾಶ ತಪ್ಪ.
ಅಕಾಡೆಮಿರ 8762942976 ಇಲ್ಲೆ 9449781423 ಮೊಬೈಲ್ ನಂಬರ್ಕ್ ಫೋನ್ ಮಾಡಿತ್, ಪೆದ ದಾಖಲ್ ಮಾಡಿಯೋಲು. ಪೆದ ದಾಖಲ್ಕ್ ಅಖೀರಿ ನಾಳಂಕೆ 15.03.2025ನೆ ಚೆನಿಯಾಚೆ ಆಯಿತಿಪ್ಪಂದ್ ಕೊಡವ ಸಾಹಿತ್ಯ ಅಕಾಡೆಮಿ ಕೊರವುಕಾರ, ಅಜ್ಜಿನಿಕಂಡ ಮಹೇಶ್ ನಾಚಯ್ಯ ಅವು ಎಣ್ಣಿತ್.
